նախընտրելի դարձնել
Հայաստանի միջազգային գործընկերների աջակցությամբ իրականացվող ծրագրերն իրականացվել են մոտ 54 տոկոսով: Ընդ որում, ներքին ռեսուրսների հաշվին իրականացվող ծրագրերն իրականացվել են 96 տոկոսով: Այս մասին հունիսի 8-ին ՀՀ Ազգային Ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի մասին զեկույցի քննարկմանն ասաց ՀՀ ֆինանսների նախարար Ատոմ Ջանջուղազյանը՝ պատասխանելով «Իմ քայլը» իշխող դաշինքից պատգամավոր Գեւորգ Պապոյանի հարցին, ով հետաքրքրվեց, թե ինչու է միջազգային գործընկերների աջակցությամբ իրականացվող ծրագրերի իրականացման ցուցանիշն այդքան ցածր:
Նախարարը, մասնավորապես, նշեց, որ եթե այդ ցուցանիշները թվով արտահայտել, ապա տարվա սկզբից հաստատված ծախսերի քանակը 1 տրիլիոն 508 միլիարդ դրամ է կազմել, սակայն փաստացի ծախսերը 1 տրիլիոն 553 միլիարդ դրամ են կազմել:
Ըստ Ջանջուղազյանի՝ իրենք միջազգային դոնորների հաշվին իրականացվող ծրագրերի ֆինանսավորման խնդիր չունեն, քանի որ կան համապատասխան պայմանավորվածություններ, եւ այդ համաձայնագրերի շրջանակներում համաձայնեցված միջոցները լիովին հասանելի են:
«Այս տեսակետից մեր խնդիրն ավելի շատ կապված է ծրագրերի իրականացման, քան ֆինանսավորման հետ: Այս ծրագրերի իրականացումը կախված է երկու գործոնից՝ տնտեսվարող սուբյեկտների վերապատրաստման եւ այդ ծրագրերը կառավարելու ունակությունից: Այս երկու հարցերը մեր օրակարգում են»,- նշեց նախարարը:
