Նախընտրելի
Հայաստանի գլխավոր դատախազությունում, ֆինանսների նախարարությունից ստացված նյութերի հիման վրա, հարուցվել է քրեական գործ`յուրացման, պաշտոնեական լիազորությունները չարաշահելու եւ պաշտոնեական կեղծիք կատարելու փաստերի առթիվ: Այս մասին NEWS.am-ի թղթակցին հայտեց գլխավոր դատախազության հասարակայնության հետ կապերի վարչության պետ Շահեն Տոնոյանը: Ըստ նրա` քրեական գործը հարուցվել է յուրացման, պաշտոնեական լիազորությունները չարաշահելու եւ պաշտոնեական կեղծիք կատարելու փաստերի առթիվ:
«ՀՀ գլխավոր դատախազության պետական շահերի պաշտպանության վարչությունն ուսումնասիրելով ՀՀ ֆինանսների նախարարությունից ստացված ՀՀ աշխատանքի եւ սոցիալական հարցերի նախարարության սոցիալական ապահովության պետական ծառայությունում իրականացված կենսաթոշակների նշանակման եւ վճարման ճշտության ստուգման արդյունքներով կազմված ակտերի հիման վրա նախապատտրաստված նյութերը, պարզել է, որ ՀՀ աշխատանքի եւ սոցիալական հարցերի նախարարության սոցիալական ապահովության պետական ծառայության կենսաթոշակների նշանակման, վճարման եւ վերահսկողության բնագավառներում կազմակերպական-տնօրինչական լիազորություններ իրականացնող պաշտոնատար անձինք, անձնական այլ շահագրգռվածությունից եւ խմբային շահերից ելնելով, իրենց պաշտոնեական դիրքը ծառայության շահերին հակառակ օգտագործելու, ինչպես նաեւ ծառայողական պարտականությունները չկատարելու, պաշտոնեական փաստաթղթերում ակնհայտ կեղծ գրառումներ մտցնելու, կեղծ փաստաթղթեր կազմելու միջոցով մահացած կենսաթոշակառուների անվամբ, ժամկետանց լիազորագրերի հիման վրա, կրկնակի թոշակներ նշանակելու եւ ավել հաշվարկված ստաժի հիման վրա 2009-2010թթ. ընթացքում ՀՀ պետական բյուջեից դուրս են գրել եւ վճարել առանձնապես խոշոր չափերի` 113 181 900 դրամ գումար: Այն յուրացվել է, ինչի արդյունքում պետությանը պատճառվել է ծանր հետեւանքներ առաջացնող էական վնաս»,-հայտարարեց Տոնոյանը:
ՀՀ գլխավոր դատախազության պետական շահերի պաշտպանության վարչության պետ Ա. Նիկողոսյանի որոշմամբ փաստի առթիվ հարուցվել է քրեական գործ` ՀՀ քրեական օրենսգրքի 179-րդ հոդվածի 3-րդ մասի 1-ին կետով, 308-րդ հոդվածի 2-րդ եւ 314-րդ հոդվածի 1-ին մասերով: Ձերբակալվածներ առայժմ չկան:
NEWS.am-ը փորձեց փաստի առթիվ մեկնաբանություն ստանալ Սոցիալական ապահովության պետական ծառայության նախկին պետ վազգեն Խաչիկյանից, սակայն նրա հեռախոսն արդեն մի քանի օր է` անջատված է: Ըստ լուրերի, Խաչիկյանի մոտ կրկին առողջական խնդիրներ են առաջացել: Նա, ինչպես հայտնել ենք նախորդիվ, մոտ մեկ ամիս առաջ հայտնվել էր հիվանդանոցում` ճնշման տատանումների հետեւանքով ի հայտ եկած խնդիրների հետեւանքով:
