նախընտրելի դարձնել
Հայաստանում պահուստային տրանսպորտային միջոցներից պետական տուրք չի գանձվի: Այս մասին սեպտեմբերի 9 ԱԺ տնտեսական հարցերի մշտական հանձնաժողովի նիստին «Պետական տուրքի մասին» օրենքում փոփոխություններ եւ լրացումներ կատարելու մասին» օրենքի նախագծի քննարկման ժամանակ ասաց «Բարգավաճ Հայաստան» կուսակցության պատգամավոր Արթուր Դալլաքյանը:
Ըստ նրա` միջմարզային եւ ներքաղաքային ուղեւորափոխադրումներ իրականացնող տրանսպորտային ընկերությունների պահանջներից մեկը պահուստային ավտոմեքենաների առկայությունն է:
«Այս ավտոմեքենաները սպասարկման գիծ դուրս չեն գալիս` պահուստավորված մնալով հիմնական ավտոբուսների եւ միկրոավտոբուսների խափանման դեպքում, սակայն դրանցից պետական տուրք է գանձվում», - պարզաբանեց պատգամավորը:
Այս կապակցությամբ նա առաջարկեց պահուստային տրանսպորտային միջոցներն ազատել այս տեսակի վճարներից, ինչը, նրա կարծիքով, դրական ազդեցություն կունենա ընկերություններում շրջանառու միջոցների ձեւավորման եւ նոր սարքավորումներ ձեռք բերելու վրա:
Նշենք, որ խորհրդարանական հանձնաժողովը դրական եզրակացություն տվեց օրենսդրական այս նախաձեռնությանը:
