նախընտրելի դարձնել
Գերմանիայի իշխանությունները որոշում են կայացրել երկրի տարածքում արգելել երեք միավորումների գործունեությունը, որոնք, իբր, կապված են «Հեզբոլլահ» շիական կազմակերպության հետ: Այս մասին չորեքշաբթի Twitter-ի իր էջին հայտարարել է Գերմանիայի ՆԳՆ ներկայացուցիչ Սթիվ Ալտերը, փոխանցում է ՏԱՍՍ-ը:
«Ներքին գործերի դաշնային նախարար Հորստ Զեեհոֆերն արգելել է [միությունների գործունեությունը], որոնք ֆինանսավորվում են «Հեզբոլլահ» ահաբեկչական կազմակերպության կողմից»,- գրել է Ալտերը:
«Նրանք, ովքեր աջակցում են ահաբեկչությանը, Գերմանիայում անվտանգ չեն լինի: Անկախ նրանից, թե ինչ տեսքով են ներկայանում դրա կողմնակիցները՝ նրանք ապաստան չեն գտնի մեր երկրում»,- ընդգծել է ԳԴՀ ՆԳՆ ներկայացուցիչը:
Արգելքը, ըստ Bild թերթի, ուժի մեջ է մտել չորեքշաբթի առավոտյան այն բանից հետո, երբ ոստիկանությունը խուզարկություններ անցկացրեց ութ դաշնային հողերում: «Գերմանական լիբանանյան ընտանիք», «Մարդիկ՝ մարդկանց համար» եւ «Խաղաղություն տուր» միավորումները նվիրատվությունների քողի ներքո միջոցներ էին հավաքում՝ դրանք հետագայում շիական «Հեզբոլլահ» կազմակերպությանը փոխանցելու համար:
Անցյալ տարվա ապրիլին Գերմանիայի ՆԳՆ-ն արգելել էր շիական «Հեզբոլլահ» կազմակերպության գործունեությունը երկրի տարածքում: Ավելի վաղ Գերմանիայում արգելված էր միայն «Հեզբոլլահ»-ի ռազմականացված թեւը: Կազմակերպության քաղաքական գործունեությունը ոչ մի պատժամիջոցների չէր ենթարկվում:
