նախընտրելի դարձնելՀայաստանի փոխվարչապետ, տարածքային կառավարման նախարար Արմեն Գեւորգյանը այսօր` հուլիսի 4-ին այցելել է Տավուշի մարզ եւ ծանոթացել Հաղարծին եւ Աղավնավանք համայնքների դպրոցների վերանորոգման աշխատանքներին, որոնց համար ծրագրով հատկացվել է համապատասխանաբար 19.2 եւ 28.8 մլն դրամ: Աշխատանքներն արդեն իսկ մեկնարկել են եւ նախատեսվում է ավարտվել մինչեւ նոր ուսումնական տարվա սկիզբը:
ՏԿՆ մամուլի ծառայությունից NEWS.am-ին հայտնում են, որ Ա. Գեւորգյանը ծանոթացել է նաեւ Հովքի համայնքային կենտրոնի շինարարական աշխատանքներին, որի համար նույն ծրագրով հատկացված է 19.2 մլն դրամ:
Ենոքավանում փոխվարչապետն ԱԺ պատգամավոր Մ. Վարդանյանի հետ մասնակցել է համայնքի գազիֆիկացմանը նվիրված արարողությանը:
Դիլիջանում Ա. Գեւորգյանը ծանոթացել է Թախտա թաղամասի նախկին մանկապարտեզի շենքը որպես տարրական դպրոց վերակառուցելու աշխատանքներին, որոնք կավարտվեն մինչեւ նոր ուսումնական տարվա մեկնարկը: Դպրոցի վերանորոգման համար առաջնահերթ խնդիրների լուծման ծրագրով հատկացվել է 38.4 մլն դրամ:
Մարզային այցի ավարտին փոխվարչապետը եղել է Դիլիջանում, որտեղ ներկա է գտնվել «Միմինո» հուշարձանի հանդիսավոր բացմանը, որին մասնակցել են հյուրեր Ռուսաստանից եւ Վրաստանից: Դիլիջանում այդ ֆիլմի հերոսներին նվիրված հուշարձանի բացման գաղափարը պատկանում է ՌԴ Վլադիմիրի երկրամասի հայ համայնքի ներկայացուցիչներին եւ ռուս բարերարներին, որոնց միջոցներով էլ կանգնեցվել է հուշարձանը: Տեղական իշխանությունները համոզմունք են հայտնել, որ այն սիրելի այցելավայր կդառնա զբոսաշրջիկների համար:
