նախընտրելի դարձնել
Նախկին փոխվարչապետ, այժմ արդեն՝ պաշտպանության նախարար Սուրեն Պապիկյանը խորհրդարանում անդրադարձավ ՀՀ կառավարության կողմից Զանգեզուրի պղնձամոլիբդենային կոմբինատի բաժնեմասը ձեռք բերելուց հետո Հայաստանում նոր պղնձաձուլարան ու ատոմակայան ունենալու հեռանկարներին։
«Առաջիկայում նշմարվում է պրոցեսի ավելի երկարաժամկետ շղթա։ Այն է՝ Հայաստանի Հանրապետությունը պիտի նախաձեռնի էներգետիկ ռեսուրսների ներգրավում, խոսքը վերաբերում է նոր ատոմակայանի կամ ատոմակայանի նոր էներգաբլոկի ստեղծմանը։ Նպատակ ունենք Հայաստանում թե՛ գործող ատոմակայանի կյանքը երկարաձգել, թե՛ նոր ատոմակայան կառուցել», - ասաց նա։
Պապիկյանը հավելեց, որ իր նշած շղթան ավելի է երկարելու, հասնելու է մինչև նոր գործարանների հիմնում:
«Այս շղթան բերելու է նրան, որ մենք պղնձաձուլարան ունենալուց հետո կունենանք արդեն և՛ ձուլված պղինձ, և՛ դրանից բխող այլ արտադրական շղթա, այլ գործարաններ», - նշեց նա՝ չմանրամասնելով սակայն, թե պղնձաձուլարանի կառուցման համար ինչ անհրաժեշտ նախադրյալներ կան։
Պապիկյանի խոսքով՝ իրականացվելիք ծրագրերը հաջողության կարող են հասնել ՀՀ կառավարության, ՌԴ կառավարության և գործարար ոլորտի համատեղ աշխատանքի արդյունքում։
