Վրաստանի խորհրդարանի նախագահ Շալվա Պապուաշվիլին եւ Թուրքիայի Ազգային մեծ ժողովի նախագահ Մուստաֆա Սենթոփն այսօր Թբիլիսիում  երկու երկրների խորհրդարանների միջեւ համագործակցության նորացված փաստաթուղթ են ստորագրել:

Մուստաֆա Շենթոփը պաշտոնական այցով Վրաստան էր ժամանել փետրվարի 21-ին, հայտնում է «Նովոստի-Գրուզիան»։

Թուրքական պատվիրակության կազմում ընդգրկված են տարբեր քաղաքական կուսակցություններ ներկայացնող պատգամավորներ։

Փաստաթղթի համաձայն՝ կողմերը կնպաստեն կանոնավոր շփումների եւ երկկողմ այցերի ամրապնդմանը` օրենսդրական ակտերի մշակման եւ ընդունման փորձ ձեռք բերելու համար:

Կողմերը մտադիր են նաեւ խորհրդակցություններ կազմակերպել միջազգային փոխշահավետ հարցերի շուրջ, աջակցել միմյանց միջազգային խորհրդարանական կազմակերպությունների շրջանակներում, ամրապնդել երկխոսությունն ու համագործակցությունն այդ ոլորտում։

Կմշակվեն ուսումնական ծրագրեր եւ համագործակցության նախագծեր, որոնք պետք է նպաստեն փորձի փոխանակմանը Վրաստանի խորհրդարանի աշխատակազմի եւ Թուրքիայի Ազգային մեծ ժողովի վարչակազմի միջեւ:

Վրաստանը եւ Թուրքիան դիվանագիտական ​​հարաբերություններ են հաստատել 1992 թվականի մայիսի 21-ին։ Երկրները համագործակցում են առեւտրի, տնտեսության, էներգետիկայի, տարածաշրջանային անվտանգության, կրթության ոլորտներում եւ միմյանց ռազմավարական կարեւոր գործընկերներ են համարում:

Թուրքիան Վրաստանի խոշորագույն առեւտրային գործընկերն է։ Վրաստանի եւ Թուրքիայի արտաքին առեւտրաշրջանառությունը 2021 թվականի սկզբից մոտ 1.9 մլրդ դոլար է կազմել, ինչը Վրաստանի ընդհանուր ապրանքաշրջանառության 14.8 տոկոսն է կազմում։