նախընտրելի դարձնելԿոտայքի մարզի առաջնահերթ խնդիրների լուծման ծրագրով մարզին հատկացվել է 1 մլրդ 318 մլն դրամ, որով մարզում իրականացվում են շենքերի տանիքների, խմելու ջրի, ոռոգման համակարգերի, ճանապարհների, կրթական եւ նախակրթական հաստատությունների վերանորոգման, վերակառուցման աշխատանքներ:
Այս մասին նշվել է Հայաստանի փոխվարչապետ, տարածքային կառավարման նախարար Արմեն Գեւորգյանի Կոտայքի մարզ այցելության ժամանակ:
ՏԿՆ մամուլի ծառայությունից NEWS.am-ին հայտնում են, որ փոխվարչապետն այցելել է Զովունի, Նոր Գեղի, Քաղսի համայնքներ, ծանոթացել համայնքների մանկապարտեզների վերանորոգման աշխատանքներին:
Այնուհետեւ Ա.Գեւորգյանը ծանոթացել է «ՀՄՀ-Հայաստան» ծրագրով Եղվարդի երրորդ կարգի ջրանցքի վերականգնման աշխատանքներին: Նախատեսված 7 942 մետր ջրանցքից ներկայումս կառուցված է 2 250 մետրը:
Ծրագրի ավարտին ոռոգելի կդառնա համայնքի 514 հեկտար հողատարածք` ներկայիս 215-ի փոխարեն: Տեղեկացվեց, որ ջրանցքի վերականգնման աշխատանքները հնարավոր կլինի ավարտել սահմանված ժամկետում` մինչեւ օգոստոսի 31-ը:
Ծրագրով վերակառուցվում է քաղաքի խմելու ջրամատակարարման ցանցը: Ըստ հաշվարկների` աշխատանքների արդյունքում մինչեւ 2011 թ. ավարտը Հրազդանում կապահովվի միջինը 17-18 ժամյա ջրամատակարարում` ներկայիս 11 ժամի դիմաց, իսկ լրացուցիչ աշխատանքների իրականացումից հետո` մինչեւ 2012 թ. ավարտը, միջինը 20-21 ժամյա ջրամատակարարում:
Հրազդանի ջրամատակարարման համակարգի բարելավման ծրագիրն իրականացվում է ՀԲ-ի վարկային 5 մլն 611 հազար դոլար միջոցներով եւ նախատեսվում է ավարտել այս տարվա հոկտեմբերին: Ասիական բանկի 550 մլն դրամ վարկային միջոցներով վերազինվում է քաղաքը խմելու ջուր սնուցող պոմպակայանը, որի աշխատանքները նախատեսվում է ավարտել մինչեւ դեկտեմբեր:
