ՆախընտրելիՏավուշի մարզում գյուղատնտեսության ոլորտում իրավիճակն ավելի լավ է, քան անցած տարիներին: Այս մասին NEWS.am-ի թղթակցի հետ զրույցում ասաց Տավուշի մարզպետ Արմեն Ղուլարյանը:
Նրա խոսքով` գյուղատնտեսության ոլորտում իրավիճակի բարելավմանն ուղղված մի շարք նպատակային ծրագրերի, այդ թվում` ցորենի, գարու, եգիպտացորենի սերմացուի հատկացման, ինչպես նաեւ տեխնիկայի գնման համար ատոնյալ վարկերի տրամադրման շնորհիվ, այս տարի ավելի շատ բերք է ստացվել եւ գալիք տարի եւս լավ բերք է ակնկալվում: «Մեր ծրագրերից է նաեւ կոոպերացիաների ստեղծումը: Կոոպերացիան ավելի շատ ներդրումներ է ներգրավելու, հնարավորություն է տալու շատ ծրագրեր իրականացնել: Յուրաքանչյուր գյուղացի աշխատում է իր փոքրիկ հողակտորի վրա, իսկ կոոպերացիան հնարավորություն է տալիս միավորել հողակտորները, ու այդպես հնարավոր է ավելի շատ հարցեր լուծել, արդյունավետությունն էլ ավելի մեծ կլինի»,-ասաց Արմեն Ղուլարյանը: Նա նշեց, որ ոռոգման երկու համակարգեր արդեն շահագործման են հանձնվել`Նոյեմբերյանի պոմպակայանը եւ Կոթիի ինքնահոս համակարգը:
Անդրադառնալով հեռուստաալիքների հեռարձակման խնդրին (նախկինում մարզում, հատկապես սահմանամերձ հատվածում, հեռարձակման խնդիր կար-խմբ)` մարզպետը նշեց, որ մարզի բոլոր համայնքներում հասանելի են Հանրային հեռուստատեսությունն ու Հ2-ը: «Հիմա արդեն վերահեռարձակվում են «Երկիր մեդիա», «Կենտրոն», «Շողակաթ» հեռուստաալիքները: Տարեվերջին վերահեռարձակման գոտում կընդգրկվի նաեւ Բերդի տրածաշրջանը»:
«Այս ամենը մեծ հույսեր է ներշնչում: Պետք է բնակչությանն ավելի շատ ներգրավվել տարբեր ծրագրերում, եւ ամենկարեւորը, որ մարդիկ հիասթափության զգացողություն չունենան»,-ընդգծեց Արմեն Ղուլարյանը»:
