Թուրքիայի հարավ-արեւելքում տեղի ունեցած երկրաշարժի հետեւանքով տուժածների տեղավորման գործընթացը բացահայտել է երկրում վարձավճարների եւ բնակարանների գների ռեկորդային բարձրացման խնդիրը, ընդդիմությունը կոչ է անում արգելել անշարժ գույքի վաճառքը օտարերկրացիներին, գրում է տեղական T24 թերթը:

«Iyi parti կուսակցության նախագահ Մերալ Աքշեները, որը հանգստյան օրերին ստուգում էր անցկացնում Հաթայ նահանգում, ուշադրություն է հրավիրել այս խնդրի վրա եւ կոչ է արել արգելել հողերի եւ անշարժ գույքի վաճառքը օտարերկրացիներին»,-գրում է թերթը։

Նշվում է, որ «թեեւ կառավարությունը դեռեւս որեւէ քայլ չի ձեռնարկել այդ հարցի շուրջ, հայտնի է դարձել, որ անշարժ գույքի վաճառքն օտարերկրացիներին անցյալ տարի ավելացել է 13 տոկոսով՝ նախորդ տարվա համեմատ»։

«Համաձայն շրջակա միջավայրի, քաղաքաշինության եւ կլիմայի փոփոխության նախարար Մուրատ Կուրումի տրամադրած տեղեկատվության, որը պատասխանել է ընդդիմադիր «Ժողովրդահանրապետական» կուսակցության պատգամավոր Սեւդա Էրդան Քըլըչի գրավոր հարցմանը, ընդհանուր առմամբ 2022 թվականին օտարերկրացիներին վաճառվել է 75 185 անշարժ գույքի օբյեկտ։ Այդ անշարժ գույքից 70 874 - ը եղել են բնակելի տներ եւ աշխատատեղեր, իսկ 4 311-ը՝ հիմնական անշարժ գույք՝ ներառյալ հողը, խաղողի այգիները եւ այգիները»,-ճշտում է թերթը։