Շոտլանդիայի նախկին առաջին նախարար Նիկոլա Սթերջենը, որը տարիներ շարունակ գերիշխում էր Շոտլանդիայի քաղաքական կյանքում, ձերբակալվել է անկախության համար պայքարող Շոտլանդիայի ազգային կուսակցության ֆինանսական գործերի հետաքննության շրջանակում, հայտնում է The Associated Press-ը:

Շոտլանդիայի ոստիկանությունը հայտնել է, որ 52-ամյա Սթերջենը բերման է ենթարկվել  «որպես կասկածյալ` կապված Շոտլանդիայի ազգային կուսակցության ֆինանսավորման շարունակվող քննության հետ»:

«Կինը կալանքի տակ է, նրան հարցաքննում են Շոտլանդիայի ոստիկանության քննիչները»,- հայտնել են  ոստիկանությունից:

Ոստիկանությունը չի հայտնել ձերբակալվածի անունը, բայց բրիտանական ԶԼՄ-ները պարզել են, որ նա Սթերջենն է։ 

Շոտլանդիայի ոստիկանությունը հետաքննում է, թե ինչպես է ծախսվել 600 հազար ֆունտ սթերլինգը (745 հազար դոլար), որը հատկացվել էր Շոտլանդիայի անկախության քարոզարշավի համար:

Կուսակցության գանձապետ Քոլին Բիթին եւ նախկին գործադիր տնօրեն Պիտեր Մյուրելը հետաքննության ընթացքում մինչեւ այդ էին ձրբակալվել եւ հարցաքննվել: Նրանցից ոչ մեկին մեղադրանք չէր առաջադրվել:

Մյուրելը Սթերջենի ամուսինն է, ապրիլին նրա ձերբակալությունից հետո ոստիկանությունը խուզարկել էր Գլազգոյում գտնվող նրանց տունը:

Սթերջենը անակնկալ կերպով հրաժարական էր տվել փետրվարին, Շոտլանդիայի ազգային կուսակցություն եւ Շոտլանդիայի կիսաինքնավար  կառավարությունը 8 տարի գլխավորելուց հետո: Նա հայտարարել էր, որ իր, իր կուսակցության եւ իր երկրի համար եկել է ճանապարհը մեկ ուրիշին զիջելու ժամանակը: