նախընտրելի դարձնել
Հայաստանի կառավարությունը կարող է հանրապետության հանքարդյունաբերական ընկերություններին տրամադրել նույն հասցեական աջակցությունը, որը տրամադրում է արժույթի տատանումներից տուժած ՏՏ ընկերություններին։ Այս մասին Ազգային ժողովում հունիսի 20-ին ԱԺ տնտեսական հարցերի մշտական հանձնաժողովի նախաձեռնած աշխատանքային խորհրդակցության ժամանակ ասաց Լեռնամետալուրգիական ընկերությունների միության նախագահ Վարդան Ջանյանը։
Նա, մասնավորապես, խոսել է դրամի աճի պատճառով առաջացած դժվարությունների մասին։ Այսպես, դոլարով հասույթը՝ դրամային արտահայտությամբ, զգալիորեն նվազել է։
«Ուրախալի է, որ մեզ հաջողվեց համաձայնության գալ կառավարության հետ այս տարվանից հարկման մակարդակն իջեցնելու վերաբերյալ։ Սակայն դոլարի փոխարժեքից բխող խնդիրները չեն վերացել»,- ասաց Ջանյանը։
Միության ղեկավարի խոսքով՝ պետությունը կարող է օգնել տուժած ընկերություններին՝ պայմանով, որ նրանք հստակ հիմնավորումներ և հաշվետվություններ ներկայացնեն փոխարժեքի տատանումների հետ կապված եկամուտների կրճատման չափի մասին։
Նա հիշեցրեց, որ արդյունաբերության ուղղակի ներդրումը ՀՆԱ-ում կազմում է մոտ 6%, իսկ անուղղակին, հաշվի առնելով հարակից ճյուղերը, տարբեր գնահատականներով հասնում է 10-11%-ի։
Հանդիպմանը ներկա էկոնոմիկայի փոխնախարար Նարեկ Տերյանը շտապեց նշել, որ Կառավարությունը ՏՏ-ն ավելի կարևոր չի համարում, քան հանքարդյունաբերությունը կամ որևէ այլ արդյունաբերություն։
«Սակայն այսօր նման աջակցության համար միջոցներ նախատեսված չեն»,- նշեց Տերյանը։
