նախընտրելի դարձնել
Այն ուժերը, որոնք ունեցան հաջողություն, խոսել էին համապետական, քաղաքական խնդիրների շուրջ, մենք՝ բացառապես քաղաքային խնդիրներից ու դրանց լուծումներից, այս մասով մենք համախոհություն չունեցանք։ Այս մասին NEWS.am–ին ասաց ԼՀԿ քաղաքապետի թեկնածու Դավիթ Խաժակյանը։
«Մարդիկ քվեարկել են քաղաքական տրամաբանության մեջ, անկախ նրանից, թե քաղաքական պնդումն ինչպիսին էր։ Քաղաքային կոնտեքստն այս ընտրություններում եղել է նվազագույն»,–ասաց նա։
Ըստ Խաժակյանի, ԼՀԿ–ն շարունակելու է աշխատել հանուն Երևանի, նոր ձեռնարկներով է փորձելու հանդես գալ։ «Որևէ դժբախտություն տեղի չի ունեցել։ Ընտրությունների ձևավորած արդյունքները, իհարկե, ցավալի են։ Եթե քվեարկությունը եղել է քաղաքական տրամաբանության մեջ, ուրեմն քաղաքային խնդիրները չեն լուծվելու։ Այս առումով որպես երևանցիներ, տուժելու ենք բոլորս», –նշեց ԼՀԿ անդամը։
Ավելի վաղ NEWS.am-ը հայտնել էր, որ Երեւանի ավագանու ընտրությունների արդյունքների նախնական տվյալներով Երեւանի ավագանի են անցնում 5 քաղաքական ուժեր՝ ՔՊ-ն (32,57 տոկոս), «Ազգային առաջընթացը» (18,89 տոկոս), «Մայր Հայաստան» դաշինքը (15,43 տոկոս), «Հանրապետությունը» (11,32 տոկոս) եւ «Հանրային ձայնը» (9,68 տոկոս):
Նշենք, որ եթե ԿԸՀ-ի հրապարակած նախնական տվյալները չփոփոխվեն, ավագանու մանդատները կբաշխվեն հետևյալ կերպ․
«Քաղաքացիական պայմանագիր» - 24
«Ազգային առաջընթաց» - 14
«Մայր Հայաստան» - 12
«Հանրապետություն» - 8
«Հանրային ձայն»- 7
Սա նշանակում է, որ որեւէ ուժի չի հաջողվել բացարձակ մեծամասնություն ձևավորել և քաղաքապետ պետք է ընտրվի կոալիցիոն կառավարմամբ։ «Հանրային ձայն» կուսակցության ղեկավար Վարդան Ղուկասյանն արդեն իսկ հայտարարել է, որ պատրաստ է կոալիցիայի «Մայր Հայաստանի» և «Ազգային առաջընթաց» կուսակցության հետ։ Նա նշել է՝ կողմ է, որ կամ Անդրանիկ Թևանյանը կամ Հայկ Մարությանը դառնան քաղաքապետ, բայց վերահսկողական ապարատը պետք է անցնի «Հանրային ձայն» կուսակցությանը։
Հայկ Մարությանը մինչ այս պահը որևէ կերպ չի արձագանքել հետընտրական զարգացումներին։
