նախընտրելի դարձնել
Ոսկու սփոթի և ֆյուչերսների գները նոր ռեկորդներ են գրանցել ուրբաթ՝ աճող սպասումների ֆոնին, որ կենտրոնական բանկերը կնվազեցնեն տոկոսադրույքները մինչև տարեվերջ, հայտնում է Euronews-ը: Սփոթի գինը պատմության մեջ առաջին անգամ մեկ ունցիայի դիմաց գերազանցել է 2500 դոլարը (2264 եվրո)՝ նախորդ շաբաթվա վերջին առևտրային օրը ֆյուչերսները 1 ունցիայի դիմաց վաճառվում էին 2540 դոլարից բարձր: Երկուշաբթի օրը ասիական շուկաներում գները չեն փոխվել։
Ընդհակառակը, գունավոր մետաղները, մասնավորապես՝ պղինձը, տնտեսական խնդիրների պատճառով դեռևս թույլ են: Պղնձի ֆյուչերսներն օգոստոսի սկզբին իջել են մինչև 5 ամսվա նվազագույնը` 3 մեկ ֆունտի դիմաց,93 դոլար (3,56 եվրո), նախքան երկուշաբթի մի փոքր վերադարձը մինչև 4,18 դոլար (3,79 եվրո), ինչը պայմանավորված էր Չինաստանում ցածր պահանջարկով:
Վերջին երեք ամիսների ընթացքում ոսկու ֆյուչերսներն աճել են 5%-ով, իսկ պղնձի ֆյուչերսները նվազել են 18%-ով։ Ոսկու և պղնձի գների վերջին տարբերությունները վկայում են, որ ներդրողները փնտրում են ապահով ակտիվներ՝ համաշխարհային տնտեսությանն առնչվող մտահոգությունների պայմաններում ձերբազատվելով աճին նպաստող հումքային ապրանքներից:
Այս տարվա սկզբին պղնձի գների կտրուկ աճը պայմանավորված էր Չինաստանում արտադրության կրճատմամբ, ինչը պայմանավորված էր պղնձի վերամշակման ավելի ցածր վճարներով:
Սակայն վերջին ամիսներին Չինաստանից ստացված թույլ տնտեսական տվյալները, զուգորդված համաշխարհային շուկաներում ԱՄՆ-ի ռեցեսիայի վախի հետևանքով հանգեցրել են նրան, որ պղնձի գները օգոստոսի 8-ին իջել են, հասնելով մինչև հնգամսյա նվազագույնին:
Չնայած շուկայական տրամադրությունների վերջին վերականգնմանը, որն անցյալ շաբաթ հանգեցրեց պղնձի գների աճին, ակնկալվում է, որ Չինաստանի անշարժ գույքի ոլորտում շարունակվող դանդաղկոտությունը կշարունակի ազդել պահանջարկի վրա: Սակայն ԱՄՆ դոլարի թուլացումը կարող է օգնել փոխհատուցելու այդ անկումը:
Երկարաժամկետ հեռանկարում պղինձը, ամենայն հավանականությամբ, կմնա վերընթաց թրենդում: Այն վերականգնվող էներգիայի, էլեկտրական ավտոմեքենաների և արհեստական բանականության տեխնոլոգիաների համար կարևորագույն ռեսուրս է:
S&P Global-ը կանխատեսում է, որ մինչև 2035 թվականը պղնձի պահանջարկը կկրկնապատկվի մինչև 50 միլիոն տոննա, ընդ որում ամենակարևոր պահանջարկն ակնկալվում է ԱՄՆ-ից, Չինաստանից, Եվրոպայից և Հնդկաստանից:
Մակրոտնտեսական ֆոնը ցույց է տալիս, որ կենտրոնական բանկերը ՝ սպառողական գների նվազման և տնտեսական աճի դանդաղեցման պատճառով մտադիր են թուլացնել դրամավարկային քաղաքականությունը: Ոսկու գները համամասնորեն պայմանավորված են ԱՄՆ դոլարի արժեքով և տոկոսադրույքներով։
Նախ, քանի որ ոսկու գները սահմանվում են ԱՄՆ դոլարով, ավելի թույլ դոլարը ոսկին այլ արժույթներով ավելի էժան է դարձնում՝ դրանով իսկ մեծացնելով թանկարժեք մետաղի նկատմամբ պահանջարկը: Երկրորդ, ցածր տոկոսադրույքները պակաս գրավիչ են դարձնում տոկոսաբեր ակտիվները, մասնավորապես՝ կանխիկ գումարը, մինչդեռ ոսկին ավելի գրավիչ է դառնում:
Անցյալ շաբաթ Մեծ Բրիտանիան և ԱՄՆ-ն հրապարակեցին հուլիս ամսվա համար նախատեսվածից ցածր գնաճի տվյալները՝ ազդարարելով այդ երկրներում ցածր տոկոսադրույքների մասին:
Բացի դրանից, Նոր Զելանդիայի Պահուստային բանկը համավարակից հետո անսպասելիորեն կատարեց իր առաջին տոկոսադրույքի իջեցումը: Բանկն ակնկալում է ավելի շատ կրճատումներ այս տարի՝ կտրուկ փոխելով քաղաքականությունը՝ երկրի տնտեսության շեշտակի անկման պատճառով:
Միաժամանակ, Մերձավոր Արևելքում և Ուկրաինայի և Ռուսաստանի միջև շարունակվող հակամարտությունների պայմաններում անվտանգ ակտիվների պահանջարկն իր հերթին նպաստում են ոսկու գների աճին:
Չինաստանը՝ պղնձի և՛ հիմնական մատակարարը, և՛ սպառողը, կարևոր մետաղների շուկայում միտումների ձևավորման գործում առանցքային դեր է խաղում:
