Դոնալդ Թրամփի թիմը ընդգրկուն ծրագիր է պատրաստում էներգետիկ ոլորտի համար, որը կներառի հեղուկ բնական գազի նոր նախագծերի արտահանման թույլտվությունների հաստատում և ԱՄՆ-ում նավթի արդյունահանման ավելացում, Reuters-ին հայտնել են երկու աղբյուրներ: Ըստ նրանց՝ Թրամփը նախատեսում է չեղյալ համարել Ջո Բայդենի կողմից ընդունված կլիմայական առանցքային օրենքները։

Առաջին առաջնահերթություններից մեկը, ըստ աղբյուրների, կլինի LNG արտահանման նոր թույլտվությունների դադարի վերացումը: Թրամփը կարագացնի դաշնային հողերում հորատման թույլտվությունների տրամադրումը և կվերականգնի ԱՄՆ-ի օֆշորներում հորատման ծրագրերը։ Նա կփորձի նաև հասնել Keystone Pipeline գազատարի շինարարության հաստատմանը: Ծրագիրը կներկայացվի երդմնակալությունից օրերի ընթացքում։

Միլիարդատեր Օլեգ Դերիպասկան բացասաբար է գնահատել Թրամփի հաղթանակը ընտրություններում. «Բարի լույս, նոր աշխարհ. Նավթը մինչև մայիս 50 դոլար, կարծես թե խաղաղություն կլինի ամենուր»,- գրել է գործարարը։

Դեռ ընտրություններից առաջ Թրամփը խոստացել էր սկսել նավթահորերի զանգվածային զարգացումը։ «Մենք ունենք ավելի շատ սև ոսկի, քան աշխարհի ցանկացած այլ երկիր: Ավելի շատ, քան Սաուդյան Արաբիան, ավելին, քան Ռուսաստանը»,- ասել է Թրամփը։ Նա հայտարարել է, որ նավթի մեկ բարելի դիմաց 40 դոլար գնով Ռուսաստանը չի կարող ռազմական գործողություններ իրականացնել։ Թրամփն ասել է, որ հարստություն կվաստակի՝ վաճառելով էներգառեսուրսներ Եվրոպային։