Սաուդյան Արաբիան կողջուներ Գազայում «Ռիվիերայի» ստեղծումը, բայց ոչ պաղեստինցի ժողովրդին վտարելու միջոցով

Սաուդյան Արաբիան կողջուներ Գազայում «Ռիվիերայի» ստեղծումը, բայց ոչ պաղեստինցի ժողովրդին վտարելու միջոցով, չորեքշաբթի ասել է սաուդցի բարձրաստիճան դիվանագետը, հաղորդում է Al Arabiya-ն։

Դիվանագետն արձագանքում էր ԱՄՆ նախագահ Դոնալդ Թրամփի վերջերս արած առաջարկին, որ ԱՄՆ-ը գրավի Գազայի հատվածը և այն վերածի «Մերձավոր Արևելքի Ռիվիերայի»:

«Իմ կառավարության դիրքորոշումն այն է, որ մենք կողջունեինք Գազայում ռիվիերայի ստեղծումը։ Կարծում եմ, որ դա հրաշալի կլիներ: Բայց մենք դա չենք պատրաստվում անել՝ տեղահանելով պաղեստինցիներին, և, իհարկե, չենք պատրաստվում նրանց տեղափոխել Սաուդյան Արաբիա։ Նրանք չեն ուզում տեղափոխվել: Գիտե՞ք, սա իրենց հողն է, սա իրենց տարածքն է։ Նրանք արժանի են ամենալավին, ինչ մենք կարող ենք տալ նրանց այնտեղ, և մենք կողջունենք ամերիկյան ջանքերը՝ բարելավելու իրենց իրավիճակը տեղում»,- ասել է Միացյալ Թագավորությունում Սաուդյան Արաբիայի դեսպան արքայազն Խալիդ բին Բանդարը London Broadcasting Company-ին (LBC):

Հարցին, թե արդյոք Սաուդյան Արաբիան ժամանակավոր ապաստան կտա պաղեստինցիներին, արքայազն Խալիդն ասաց, որ որոշումը պետք է կայացնեն իրենք՝ պաղեստինցիները։

«Գիտեք, մենք ուրախ ենք ընդունել մարդկանց, և մենք հյուրընկալ երկիր ենք: Եթե ​​իրավիճակ ստեղծվի, որ նրանք ցանկանում են գալ Սաուդյան Արաբիա, ապա ողջունելի են, բայց չեմ կարծում, որ նրանք կցանկանան հեռանալ։ Նրանք ցանկանում են պահպանել այն հողը, որը նրանց սպառնացել են, որ կկորցնեն։ Եվ ես կարծում եմ, որ դա ամենակարեւորն է»,- ասաց նա։

Սակայն, նախքան Գազայի վերականգնումը, այն պետք է մաքրվի, և պետք է ստեղծվի խաղաղության ինչ-որ մեխանիզմ և բոլորի կողմից ճանաչված պաղեստինյան կառավարություն, ներառյալ Իսրայելը, ասաց նա:

«Գիտեք, 75 տարի առաջ շատ պաղեստինցիներ թողեցին իրենց տները և կորցրին դրանք: Չեմ կարծում, որ նրանք ցանկանում են դա կրկնել», - ասել է արքայազն Խալիդը:

Սաուդյան Արաբիայի դիվանագետը կրկնել է Սաուդյան Արաբիայի դիրքորոշումն արաբա-իսրայելական հակամարտության վերաբերյալ, որը տասնամյակներ շարունակ անփոփոխ է մնացել:

«Սա երկու պետությունների շատ պարզ լուծում է՝ հիմնված 1967 թվականի սահմանների վրա՝ մայրաքաղաք Արևելյան Երուսաղեմով»,- ասել է նա։

«Բայց կարեւոր են պաղեստինցիների եւ իսրայելցիների տեսակետները։ Նրանք պետք է համաձայնության գան, թե որ որոշումն է ճիշտ։ Մեր տեսանկյունից մենք այլ տարբերակ չենք տեսնում»,- հավելել է դիվանագետը։