Նախընտրելի
Մեծ Բրիտանիայի վարչապետ Քիր Սթարմերը Փարիզում Ուկրաինայի հարցով արտակարգ գագաթնաժողովից հետո հայտարարել է, որ հաջորդ շաբաթ կմեկնի Միացյալ Նահանգներ՝ ԱՄՆ նախագահ Դոնալդ Թրամփի հետ քննարկելու «երկարաժամկետ խաղաղության հիմնական տարրերը», հայտնում է BBC-ի ռուսական ծառայությունը։
Սթարմերը ասել է, որ առաջիկա օրերին կխոսի նաև Ուկրաինայի նախագահ Վլադիմիր Զելենսկու հետ, և սպասվում է, որ դրանից հետո եվրոպացի առաջնորդները նոր հանդիպում կանցկացնեն։
Երկուշաբթի Փարիզի գագաթնաժողովից հետո որոշումներ չեն հայտարարվել: Եվրոպացի առաջնորդները հավաքվել են քննարկելու, թե ինչ պետք է անեն Թրամփի վարչակազմի՝ առանց Եվրոպայի մասնակցության Մոսկվայի հետ բանակցություններ վարելու ծրագրի վերաբերյալ։
«Մենք դեռ գտնվում ենք գործընթացի շատ վաղ փուլում», - ասաց Սթարմերը լրագրողներին:
Նա ընդգծել է, որ ցանկացած խաղաղ համաձայնագիր պետք է երաշխավորվի ԱՄՆ-ի կողմից։
«ԱՄՆ-ի անվտանգության երաշխիքները Ռուսաստանին Ուկրաինային կրկին հարձակվելուց հետ պահելու միակ արդյունավետ միջոցն են»,- ասել է Մեծ Բրիտանիայի վարչապետը։
