Ուկրաինան և նրա եվրոպացի դաշնակիցները մշակել և Միացյալ Նահանգների քննարկմանն են ներկայացրել մի Կիևի և ԵՄ-ի տեսանկյունից ընդունելի փաստաթուղթ, որը պարունակում է պատերազմի ավարտի պայմաններ։ Ի թիվս այլ բաների, առաջարկվում է Ուկրաինային փոխհատուցում տրամադրել սառեցված ռուսական ակտիվների հաշվին և համաձայնել Մոսկվայի դեմ ամերիկյան պատժամիջոցների աստիճանական մեղմացմանը։

Փաստաթուղթը, ինչպես հաղորդում է Reuters-ը, մշակվել է ապրիլի 23-ին Լոնդոնում ուկրաինացի և եվրոպացի պաշտոնյաների մասնակցությամբ անցկացված բանակցությունների ժամանակ։ Այն ներառում է չորս փաթեթ՝ հրադադար, տարածքային հարց, Ուկրաինայի անվտանգության երաշխիքներ և տնտեսական ասպեկտներ։

«Ռուսաստանի և Ուկրաինայի միջև շրջանակային համաձայնագրի» առաջին կետը «լիակատար և անվերապահ» ​​հրադադարն է ցամաքում, օդում և ծովում և հրադադարի «տեխնիկական իրականացման» վերաբերյալ բանակցությունների՝ «լիարժեք խաղաղության համաձայնագրի կնքման օրակարգի և պայմանների նախապատրաստմանը զուգահեռ»«անհապաղ» ընթացող մեկնարկ։ Հրադադարի ռեժիմը վերահսկում են Միացյալ Նահանգները և երրորդ երկրների գործընկերները։

Փաստաթուղթը նախատեսում է Ուկրաինային ֆինանսական փոխհատուցում պատերազմի պատճառած վնասի համար։ «Ուկրաինան լիովին կվերականգնվի և կստանա ֆինանսական փոխհատուցում, դրանց թվում՝ ռուսական ինքնիշխան ակտիվների միջոցով, որոնք կմնան սառեցված մինչև Ռուսաստանը չփոխհատուցի վնասը»,-ասված է փաստաթղթի նախագծում։

Վաշինգտոնի կողմից 2014 թվականից ի վեր Ռուսաստանի նկատմամբ սահմանված սահմանափակումները «կարող են աստիճանաբար մեղմացվել», բայց միայն «կայուն խաղաղության» ապահովումից հետո։ Այդ պատժամիջոցները կվերականգնվեն, եթե Մոսկվան խախտի խաղաղության համաձայնագիրը։ Ակնկալվում է նաև, որ ԱՄՆ-ը և Ուկրաինան տնտեսական համագործակցության և հանքանյութերի արդյունահանման վերաբերյալ համաձայնագիր կստորագրեն։

Փաստաթղթում նշվում է, որ օկուպացված տարածքների հարցը կքննարկվի հրադադարից հետո, և այնտեղ չի նշվում Ռուսաստանի կողմից Ուկրաինայի որևէ տարածքի, այդ թվում՝ Ղրիմի նկատմամբ վերահսկողության ճանաչման մասին։ Կիևը վերականգնում է վերահսկողությունը Զապորոժիեի ատոմակայանի, ինչպես նաև Կախովկայի հիդրոէլեկտրակայանի նկատմամբ՝ Միացյալ Նահանգների մասնակցությամբ, և դեպի նավագնացություն Դնեպրով և վերահսկողություն Քինբուրնի ծոցի նկատմամբ անարգել մուտք է ստանում։

Բացի դրանից, դաշնակիցները դեմ են արտահայտվել Ուկրաինայի զինված ուժերի թվաքանակի և կազմի, ինչպես նաև Ուկրաինայի դաշնակիցների կողմից երկրի տարածքում ռազմական ուժերի տեղակայման ցանկացած սահմանափակման։ Ուկրաինայի համար անվտանգության «հուսալի երաշխիքներ» են նախատեսվում, ներառյալ՝ Միացյալ Նահանգների կողմից, «5-րդ հոդվածի տիպի համաձայնագրի» (ՆԱՏՕ-ի փոխադարձ պաշտպանության դրույթ) շրջանակում։

Փաստաթղթի մի շարք կետեր հակասում են այն ամենին, ինչ ավելի վաղ ներկայացվել էր ապրիլի 17-ին Փարիզում ԱՄՆ-ի, ԵՄ-ի և Ուկրաինայի ներկայացուցիչների միջև բանակցությունների ժամանակ։ Վերոնշյալի հիման վրա հիմնական տարաձայնությունները վերաբերում են տարածքային հարցերի լուծման հաջորդականությանը, Ռուսաստանի դեմ պատժամիջոցների վերացմանը, ինչպես նաև Ուկրաինայի անվտանգության երաշխիքներին և ուկրաինական զինված ուժերի թվաքանակին։