Վենեսուելայի նախագահ Նիկոլաս Մադուրոն այցելել է Սանկտ Պետերբուրգ, հաղորդել է «Կոմերսանտը»։

Մոսկվայի երկաթուղային կայարանում նրան դիմավորել է նահանգապետ Ալեքսանդր Բեգլովը։ Հանդիպումը նվիրված է Սանկտ Պետերբուրգի եւ Վենեսուելայի միջեւ երկխոսության շարունակմանը եւ համագործակցության ամրապնդմանը, հայտնել է Սանկտ Պետերբուրգի վարչակազմի տեղեկատվության բաժինը։

Բեգլովը երախտագիտություն է հայտնել հարավամերիկյան երկրի ղեկավարին՝ նշելով. «Մեզ համար պատիվ է ողջունել մեր երկրի մեծ ընկերոջը հերոս քաղաքում՝ Լենինգրադում»։ Նա նաեւ ընդգծել է, որ քաղաքը գնահատում է Վենեսուելայի ժողովրդի հերոսական պայքարը հանուն անկախության։

Ի պատիվ դրա՝ Սանկտ Պետերբուրգում կանգնեցվել է Վենեսուելայի ազգային հերոս Ֆրանսիսկո դե Միրանդայի հուշարձանը՝ քաղաքի 300-ամյակի այգում։ Նահանգապետն ավելացրել է, որ հյուսիսային մայրաքաղաքի եւ Վենեսուելայի միջեւ կան «փոխշահավետ համագործակցության մեծ հեռանկարներ» տնտեսական եւ հումանիտար ոլորտներում։

Սմոլնիում կկայանա նահանգապետ Ալեքսանդր Բեգլովի եւ Նիկոլաս Մադուրոյի աշխատանքային հանդիպումը։ Նախատեսվում են նաեւ մշակութային միջոցառումներ՝ ուղղված հումանիտար կապերի ամրապնդմանը։

Մինչ այդ Մադուրոն Մոսկվայում մասնակցել է Հայրենական մեծ պատերազմում տարած հաղթանակի 80-ամյակին նվիրված տոնակատարություններին։ Կարմիր հրապարակում շքերթից հետո նա Ռուսաստանի նախագահ Վլադիմիր Պուտինի եւ համաշխարհային այլ առաջնորդների հետ Ալեքսանդրովյան այգում հարգել է զոհվածների հիշատակը։