նախընտրելի դարձնել
Ուկրաինայում Գերմանիայի դեսպան Մարտին Յեգերը կդառնա Դաշնային հետախուզական ծառայության (BND) նոր ղեկավարը, չորեքշաբթի հաղորդել են գերմանական լրատվամիջոցները՝ վկայակոչելով կառավարության աղբյուրներին։
Յեգերը Գերմանիայի հետախուզության ղեկավարի պաշտոնում կփոխարինի Բրունո Կալին, իսկ Կալը կզբաղեցնի Վատիկանում դեսպանի պաշտոնը։
Գերմանիայի կառավարությունը դեռևս պաշտոնապես չի հաստատել այդ փոփոխությունը, գրում է Euronews-ը։
Յեգերը համարվում է փորձառու ճգնաժամային դիվանագետ՝ շնորհիվ Ուկրաինայում Գերմանիայի դեսպանի իր պաշտոնի, որը նա զբաղեցնում է 2023 թվականից։
Նախկինում նա եղել է Իրաքում և Աֆղանստանում Գերմանիայի դեսպան։
Գերմանիայում Քրիստոնեա-դեմոկրատական միության (ՔԴՄ) անդամ Յեգերը զբաղեցնում էր Վոլֆգանգ Շոյբլեի գլխավորած Ֆինանսների նախարարության մամուլի քարտուղարի պաշտոնը։
Նա աշխատել է նաև որպես պետքարտուղար Ներքին գործերի նախարարությունում։
Դաշնային հետախուզական ծառայությունը հաշվետու է կանցլերությանը և, համապատասխանաբար, կանցլեր Ֆրիդրիխ Մերցին, որը լիազորված է նշանակել նախագահին։
BND-ի խնդիրների թվում են արտաքին և անվտանգության քաղաքականությանը վերաբերող տեղեկությունների հավաքումն ու գնահատումը, ինչպես նաև դաշնային կառավարությանը զեկույցների և վերլուծությունների տրամադրումը։
BND-ն այն քիչ կառավարական գերատեսչություններից մեկն է, որը լիազորված է օգտագործել հետախուզական ծառայություններ, մասնավորապես՝ լրտեսությունը։
Ըստ գերմանական լրատվամիջոցների հաղորդագրությունների՝ Գերմանիայի կառավարությունը մտադիր է արմատապես վերակազմակերպել հետախուզական ծառայությունն ու ավելացնել Դաշնային հետախուզական ծառայության (BND) ֆինանսավորումը։
