Գերմանիայի կանցլեր Ֆրիդրիխ Մերցը հեռախոսազրույց է ունեցել Իսրայելի վարչապետ Բենիամին Նեթանյահուի հետ և Իսրայելին կոչ արել Իրանի դեմ պատերազմում զսպվածություն ցուցաբերել, Reuters-ին հայտնել է Գերմանիայի կառավարության աղբյուրը։

Աղբյուրը նշել է, որ չորեքշաբթի երեկոյան հեռախոսազրույցի ընթացքում Մերցը հայտնել է Գերմանիայի հիմնարար աջակցությունը Իրանի միջուկային ենթակառուցվածքների վրա Իսրայելի ռազմական հարձակումներին, սակայն ընդգծել է հակամարտության դիվանագիտական ​​լուծումներ գտնելու կարևորությունը։

Գերմանիան նախատեսում է ուրբաթ Ժնևում իր եվրոպացի գործընկերների և Իրանի արտգործնախարարի հետ միջուկային բանակցություններ անցկացնել։ Բանակցությունների նպատակն է Իրանից երաշխիքներ ստանալ, որ նրա միջուկային ծրագիրն օգտագործվում է բացառապես քաղաքացիական նպատակներով։

Իրանի արտգործնախարար Աբբաս Արաղչին հաստատել է, որ մասնակցելու է հանդիպմանը Գերմանիայի, Մեծ Բրիտանիայի և Ֆրանսիայի իր գործընկերների հետ։

Կատարի էմիրի հետ զրույցում Մերցը համաձայնել է, որ հակամարտության սրացում չպետք է լինի։