Ամերիկյան Ռոդ Այլենդ նահանգի ափերի մոտ 250 տարի անց հայտնաբերել են անգլիացի ծովագնաց, ճանապարհորդ և հայտնագործող Ջեյմս Կուկի խորտակված նավը, գրում է The Independent-ը։

Ինչպես հայտնում է թերթը, 1768-1771 թվականներին «Ինդևոր» նավը դարձել է առաջին եվրոպական նավը, որը հասել է արևելյան Ավստրալիա։ 1778 թվականին այն խորտակվել է ԱՄՆ ափերի մոտ՝ Անկախության պատերազմի ժամանակ։ Դարեր շարունակ նավը համարվում էր կորած, սակայն այժմ նրա մնացորդները հայտնաբերվել են Նյուպորտի նավահանգստում։ «Ինդևոր»-ն օգտագործվել է, ի թիվս այլնի, բրիտանական զորքերի փոխադրման համար և որպես բանտանավ։

«Երբ ամերիկացիներն ու ֆրանսիացիները պաշարեցին Նյուպորտի նավահանգիստը, նավը 13 նավերից մեկն էր, որոնք միտումնավոր խորտակվել էին՝ որպես ստորջրյա արգելապատնեշ։ Այն այդպես էլ չի հաջողվել փրկել, և այն մնացել է խորտակված վիճակում»,- ասվում է հոդվածում։

Ըստ Ավստրալիայի ազգային ծովային թանգարանի տնօրեն Դերիլ Կարպի, «Ինդևորի» վերաբերյալ փորձագետների հաշվետվությունը 25 տարվա հնագիտական և ստորջրյա հետազոտությունների արդյունք է։ Նավի մնացորդները համեմատել են 1768 թվականի Կուկի նավի նկարագրության հետ։ Գիտնականներին հաջողվել է դրանք նույնականացնել փայտե գերանների չափերի շնորհիվ։