Դյուսելդորֆի տոնավաճառում տեղի ունեցած անհաջող հրավառության հետևանքով առնվազն 19 մարդ է վիրավորվել

Ուրբաթ ուշ երեկոյան Ռեյն գետի ափին անցկացվող Rheinkirmes տոնավաճառի ժամանակ տեղի ունեցած միջադեպից հետո հրապարակված լուսանկարներում երևում է, թե ինչպես են հրավառությունները պայթում գետի ափին՝ գրեթե գետնի մակարդակին։ Տուժածների թվում եղել է նաև երեխա, հաղորդում է DPA գործակալությունը։

Դյուսելդորֆի հրշեջ ծառայությունը հայտնել է, որ ոստիկանությունը դեռևս հետաքննում է միջադեպի պատճառները։

«Մեր մտքերն ու կարեկցանքը տուժածների և նրանց ընտանիքների հետ են։ Մաղթում ենք բոլոր տուժածներին շուտափույթ ապաքինում և այս միջադեպի հետևանքների հաղթահարում։ Մենք խորապես ափսոսում ենք կատարվածի համար», — նշել է ընկերության ներկայացուցիչ Պետեր Դիտլմայերը։

Նրա խոսքով՝ կազմակերպիչներն արտակարգ կերպով ավարտել են տոնավաճառը և այժմ քննարկում են՝ արժե՞ արդյոք շարունակել ավանդական հրավառության անցկացումը հաջորդ տարում։

Այս 10-օրյա տոնավաճառի ընթացքում գործում են ատրակցիոններ, դրոններով շոուներ, հրավառություններ և այլ զվարճանքներ, որոնք կազմակերպվում են հարյուրավոր աշխատակիցների կողմից՝ քաղաքի պատմական թաղամասի դիմաց գտնվող Ռեյն գետի ձախ ափին։ Տոնավաճառը կազմակերպում է Սուրբ Սեբաստյանի հրաձգության ակումբը, որը հիմնադրվել է դեռ 1316 թվականին։