Նախընտրելի
Գերմանական Rheinmetall պաշտպանական կոնցեռնը մտադիր է այս տարի Ուկրաինային փոխանցել Skyranger շարժական հրետանային համակարգեր, որոնք նախատեսված են անօդաչու թռչող սարքերի դեմ պայքարելու համար։ Այս մասին ZDF հեռուստաալիքին տված հարցազրույցում հայտարարել է ընկերության ղեկավար Արմին Պապերգերը։
Ըստ Պապերգերի՝ Ուկրաինայի հետ Skyranger նորագույն համակարգերի մատակարարման պայմանագիրը կստորագրվի այս շաբաթ Լոնդոնում։ Նա ընդգծել է, որ այս շարժական համալիրները, որոնք առաջին անգամ կտրամադրվեն Ուկրաինային, նախատեսված են անօդաչու թռչող սարքերի հարձակումները հետ մղելու համար։ Սպառազինության առաջին մատակարարումներն ակնկալվում են արդեն այս տարի։
Rheinmetall-ը տարեկան 70-100 Skyranger աշտարակ արտադրելու հզորություն ունի և ձգտում է այն հասցնել տարեկան 200 միավորի։ Նա պարզաբանել է, որ մատակարարվող համակարգերը գերմանական բանակի սպառազինության մեջ չկան։ Ընկերության ղեկավարը հավաստիացրել է, որ յուրաքանչյուր Skyranger համակարգ ի վիճակի է վերահսկել 16 քառակուսի կիլոմետր տարածք՝ երաշխավորելով այդ գոտում բոլոր անօդաչու թռչող սարքերի ամբողջական ոչնչացումը։
Papperger-ը տեղեկություններ չի տրամադրել այն շասսիի մասին, որի վրա կտեղադրվեն այս համակարգերը։
