Գազայի հատվածում հրադադարի համաձայնագրի պայմաններն արդեն իսկ պատրաստ էին ԱՄՆ նախկին նախագահ Ջո Բայդենի օրոք՝ 2024թ․ սեպտեմբերին, սակայն Իսրայելի վարչապետ Բենիամին Նեթանյահուն այդ ժամանակ մերժեց հրադադարը։ Այս մասին հաղորդել է բրիտանական The Times թերթը՝ հղում կատարելով իսրայելցի անկախ բանակցող Գերշոն Բասկինին։

«Այս գործարքը կարող էր կնքվել շատ ավելի վաղ։ ՀԱՄԱՍ-ը նույն պայմաններին համաձայնել էր 2024թ․ սեպտեմբերին։ Սակայն այդ ժամանակ իսրայելցի բանակցողները պատասխանել էին, որ «վարչապետը (Բենիամին Նեթանյահուն) չի համաձայնել դադարեցնել պատերազմը»,- հայտնել է Բասկինը։

Նրա խոսքով՝ Բայդենի վարչակազմը նույնպես լուրջ չի ընդունել առաջարկվող համաձայնագիրը։ Բասկինը հետագայում պարզել է, որ իսրայելական կողմը համաձայնագիրը կնքելու որեւէ ծրագիր չի ունեցել մինչեւ ԱՄՆ նախագահի փոփոխությունը։

Հոկտեմբերի 10-ի գիշերը Իսրայելի վարչապետի գրասենյակը հայտարարեց, որ Իսրայելի կառավարությունը հաստատել է «բոլոր պատանդների՝ թե՛ կենդանի, թե՛ մահացած, ազատ արձակման համաձայնագիրը»։ Հոկտեմբերի 9-ին ԱՄՆ նախագահ Դոնալդ Թրամփը հայտարարեց, որ Իսրայելի եւ ​​պաղեստինյան արմատական ՀԱՄԱՍ շարժման ներկայացուցիչները Եգիպտոսում բանակցություններից հետո համաձայնության են եկել խաղաղության ծրագրի առաջին փուլի վերաբերյալ։ Նա նշել է, որ այս փուլը ենթադրում է բոլոր պատանդների ազատ արձակում «մոտ ապագայում» եւ իսրայելական զորքերի դուրսբերում Գազայի ներսում համաձայնեցված գծում։