նախընտրելի դարձնելՀՀ վաստակավոր դերասան Սոս Սարգսյանի գլխավորած Ազգային կինոյի մրցանակաբաշխության հեղինակավոր ժյուրին, փակ գաղտնի քվեարկությամբ արդեն ընտրել է 12 անվանակարգերում հավակնորդ 36 ֆիլմերը ( 3-ական ֆիլմեր յուրաքանչյուր անվանակարգի համար): Քվեարկությունը տեղի է ունեցել նախապես կազմված անկախ հաշվիչ հանձնաժողովի ներկայությամբ:
Հիշեցնենք, որ մրցույթին մասնակցության հայտ ներկայացված 103 ֆիլմերը` հեղինակների հայեցողությամբ առաջադրվել էին տարբեր անվանակարգերում:
Մասնավորապես «Լավագույն խաղարկային ֆիլմ» անվանակարգում ներկայացված 20 հայտից երեք հավակնորդներն են ռեժիսորներ Առնոլդ Աղաբաբովի, Սուրեն Բաբայանի եւ Վիգեն Չալդրանյանի համապատասխանաբար «Որտեղ էիր, մարդ Աստծո», «Ժանո» եւ «Ձայն բարբառո…» ֆիլմերը:
«Լավագույն ռեժիսոր» անվանակարգում ներկայացված 18 հայտից քվեարկության արդյունքում հավակնորդներ դարձան ռեժ. Հարություն Խաչատրայանը` «Սահման», ռեժ. Դմիտրի Կեսայանցը` «Անիծվածները» եւ ռեժ. Վիգեն Չալդրանյանը` «Ձայն Բարբառո…» ֆիլմերիհամար:
«Լավագույն դերասանուհի» անվանակարգում ներկայացված 10 հայտից ընտրվեց Աննա Էլբակյանը, Անահիտ Հարությունյանը եւ Ռուզան Վիթ Մեսրոպյանը` համպատասխանաբար «Որտեղ էիր, մարդ Աստծո», «Ուրախ ավտոբուս» եւ «Քրմուհին» ֆիլմերից:
«Լավագույն դերասան» անվանակարգում առաջադրված 20 հայտից քվերակության արդյունքում ընտրվեցին Ժան Պիեր Նշանյանը, Նիկոլայ Ծատուրյանը եւ Միքայել Պողոսյանը համապատասխանաբար «Ժանո» , «Ընկեր Փանջունի» եւ «Երեւան, ջան» ֆիլմերից:
«Լավագույն կարճամետրաժ ֆիլմ» անվանակարգի համար ներկայացված 24 ֆիլմերից ընտրվեցին Գագիկ Հարությունյանի «Յարխուշտա», Վահե Գեւորգյանցի «Մեծ տոն» եւ Արման Չիլինգարյանի «Ցատկերթ» ֆիլմերը:
«Լավագույն վավերագրական ֆիլմ» անվանակարգում ներկայացված են եղել թվով ամենաշատ` 36 հայտերը, որոնցից ժուրին ընտրել է Էդգար Բաղդասարյանի «Արարատից Սիոն», Վարդան Հովհաննիսյանի «Պատմություններ պատերազմի եւ խաղաղության մասին» եւ Հովիկ Հախվերդյանի «Նարեկացի որոնելիս» ֆիլմերը:
«Լավագույն անիմացիոն ֆիլմ» անվանակարգի համար ներկայացված 10 հայտից ընտրվել ե Դավիթ Սահակյանի «Հայրեններ», Արման Մանարյանի «Սասունցի Դավիթ» եւ Գայանե Մարտիրոսյանի «Տարաշխարհիկները» ֆիլմերը:
Ընտրվել են նաեւ մյուս` «Լավագույն օպերատոր», «Լավագույն սցենարի հեղինակ», «Լավագույն նկարիչ», «Լավագույն կոմպոզիտոր» անվանակարգերի հավակնորդները:
Ազգային կինոյի մրցանակաբաշխության վերջնական հաղթողները` 12 լավագույնները հայտնի կդառնան մարտի 18-ին` Ալ.Սպենդիարյանի անվան օպերայի եւ բալետի ազգային ակադեմիական թատրոնում կայանալիք հանդիսավոր երեկոյի ժամանակ:
Հավակնորդ բոլոր ֆիլմերը մինչեւ մրցանակաբաշխության օրը կցուցադրվեն «Նաիրի» կինոթատրոնում եւ հեռուստատեսությամբ, նախապես կազմված ցանկի համաձայն:
