նախընտրելի դարձնելԿոլումբիայում զբոսաշրջային անսովոր երթուղի են մշակել` նարկոբարոն Պաբլո Էսկոբարի հետքերով:
Զբոսաշրջիկներին առաջարկվում է սկզբում այցելել Մեդելինայի Լոս Օլիվոս թաղամասի այն տունը, որտեղ սպանվել կամ, համաձայն լեգենդի, ինքնասպան է եղել Պաբլո Էսկոբարը: Այնուհետեւ նրանց ուղեկցում են Դալլաս շինության ավերակների մոտ` այն գործարար կենտրոնի, որտեղ Էսկոբարն սկսել է վարել իր առեւտրային գործերը: Շինության պատերից մեկին պահպանվել է Pablo vive!!! գրառումը, որն արվել է Էսկոբարի շտաբի վրա մրցակիցների զինված հարձակումից հետո:
Զբոսաշրջիկներին ցույց են տալիս նաեւ Hacienda Napoles-ի շրջակայքում նրա մասնավոր կալվածքը, որտեղ պահպանվել է անցած հարյուրամյակի 70-80-ականների շունչը:
Երթուղու կանգառներից մեկն էլ Montesacro գերեզմանատունն է, որտեղ թաղված են նարկոբարոնը, նրա եղբայրն ու ծնողները, ինչպես նաեւ նրա հետ զոհված թիկնապահները:
Երթուղու առանցքային կետը Պաբլոյի հարազատ եղբոր` Ռոբերտո Էսկոբարի հետ հանդիպումն է, որը ժամանակին հայտնի էր արջուկ (El Osito) մականունով: Ճիշտ է, գիդը նախօրոք զգուշացնում է, որ Ռոբերտոն արդարացնում է Էսկոբար ընտանիքի բոլոր գործողությունները:
Ռոբերտոն, որը ձեռքում ռումբի պայթյունի հետեւանքով խլացել եւ կուրացել է, կարոտով հիշում է այն ժամանակները, որոնք ասես արկածային վեպ լինեն, որտեղ գլխավոր հերոսներն ինքը եւ իր եղբայրն են:
Միաժամանակ, ինչպես նշում է «Ռոսբալտը», Կոլումբիայում այս «գրավիչ» շրջագայությունը միանշանակ չի ընդունվել: Երկիրը հսկայական ջանքեր է գործադրում` 80-ականների նարկոպատերազմներից հետո խաղաղ կյանք ապահովելու համար: Մեդելինի իշխանությունները կոչ են անում զերծ մնալ իր ժամանակի մեծագույն հանցագործի կերպարն ավելորդ անգամ իդեալականացնելուց:
