Հնությունների հարցերով գերագույն խորհրդի հովանու ներքո անցկացված պեղումները տևել են վեց տարի և եզակի կրոնական համալիր են հայտնաբերել: Ըստ «Ֆոկուս»-ի, Եգիպտոսի զբոսաշրջության և հնությունների նախարար Շարիֆ Ֆաթհին այս գտածոն կարևոր է անվանել՝ նշելով Հյուսիսային Սինայի նշանակությունը թե՛ պատմության, թե՛ հնագիտության մեջ:

Ըստ Հնությունների հարցերով գերագույն խորհրդի գլխավոր քարտուղար Հիշամ Լիթիի, այս գտածոն հաստատել է, որ Պելուզիումը ժամանակին ծառայել է որպես տարբեր մշակույթների հանդիպման առանցքային վայր: «Այս գտածոն ցույց է տալիս քաղաքի ազդեցությունը քաղաքակրթությունների միջև գաղափարների փոխանակման վրա»,- հայտարարել է նա՝ նշելով, որ ճարտարապետությունը համատեղում է եգիպտական, հելլենիստական և հռոմեական գծեր:

Պեղումների վայրի կենտրոնում հետազոտողները հայտնաբերել են մոտ 35 մետր լայնությամբ մեծ կլոր ավազան, որը միացված է հին Պելուզիական Նեղոսի վտակին: Հնագետները ենթադրել են, որ ավազանը պարունակել է ջուր, որը խորհրդանշականորեն կապված է եղել Նեղոսի բերրի տիղմի հետ:

Այս կապը կարող է վերաբերել Բլոզիուս աստծուն, որի անունը, հավանաբար, ծագում է «կավ» նշանակող հունարեն բառից: Ավազանի շուրջ գիտնականները հայտնաբերել են ջրային անցքերի զարգացած համակարգ, ինչպես նաև քառակուսի հիմք, որի վրա, հավանաբար, կանգնած է եղել աստծո արձանը: Փաստերը վկայում են, որ այս վայրն անընդմեջ օգտագործվել է մ.թ.ա. II դարից մինչև մ.թ. VI դարը՝ ժամանակի ընթացքում կրելով միայն չնչին կառուցվածքային փոփոխություններ:

Դոկտոր Հիշամ Հուսեյնի ղեկավարությամբ 2019 թվականին կատարված վաղ աշխատանքների ժամանակ հայտնաբերվել էր կլոր կառույցի միայն մի մասը: Այն ժամանակ հետազոտողները կարծում էին, որ դա կարող է լինել հասարակական շենք, հավանաբար՝ սենատ: Սակայն հետագա պեղումներն ու վերլուծությունները փոխել են այդ կարծիքը:

Հուսեյնը պարզաբանել է. «Ընթացիկ պեղումները և համեմատական հետազոտությունները լիովին փոխել են մեր պատկերացումները: Այժմ մենք գիտենք, որ սա սրբազան ջրային կառույց էր, որն օգտագործվում էր կրոնական ծիսակատարությունների համար, այլ ոչ թե քաղաքական կառույց»: Փորձագետները, մասնավորապես՝ Սորբոնի համալսարանի մասնագետները, ծանոթացել են հետազոտության արդյունքներին և պաշտպանել այս մեկնաբանությունը:

Այս գտածոն արժեքավոր տեղեկություններ է տվել այն մասին, թե ինչպես են կրոնը, ջուրը և սիմվոլիզմը կապված եղել հին հասարակություններում: Այն նաև ցույց է տվել, թե ինչպես է Պելուզիումը հանդես եկել որպես կապող օղակ Եգիպտոսի և միջերկրածովյան աշխարհի միջև, որտեղ միախառնվել և տարածվել են տարբեր մշակութային գաղափարներ: