ՆախընտրելիMcDonald`s-ի գլխավոր տնօրեն Ջիմ Սքիները, որը երկար տարիներ ապահովել է ընկերության աճը, հայտարարել է հրաժարական տալու մասին: Նա պաշտոնը կլքի 2012թ. հուլիսի 1-ին: Նրան կփոխարինի գործադիր տնօրեն Դոն Թոմփսոնը:
67-ամյա Սքիները ընկերությունում աշխատել է 41տարի: Նա 2003թ. ներդրված «Հաղթանակի ծրագրի» (Plan to Win) գլխավոր մշակողներից էր, որի հիմնական կարգախոսն էր «լինել ավելի լավը, ոչ թե պարզապես ավելի մեծը»:
Տնօրենների խորհրդի նախագահ Էնդի Մաքքենան նշել է, որ Սքիների ղեկավարության ներքո ընկերության կապիտալը գերազանցել է 100 միլիարդ դոլարը, իսկ բաժնետիրական շահույթը կազմել է 21%: McDonald`s ընկերությունը Սքիների ղեկավարության ամբողջ ընթացքում անընդհատ աճ է գրանցել, հայտնում է «Ռոսբալտը»:
McDonald`s Corporation-ը ձեւավորվել է 1940 թվականին հիմնված ռեստորան-բարբեքյուից, որը պատկանել է Ռիչարդ եւ Մորիս Մաքդոնալդներին: 1955 թվականին ձեռնարկությունը գնել է գործարար Ռեյ Քրոքը, որի ռազմավարության ուղղություններից էր համաշխարհային ընդլայնումը: Ներկայումս 119 երկրներում ընկերության ապրանքանիշի տակ աշխատում են 33 հազար ռեստորաններ` 1,7 միլիոն աշխատակիցներով, ամեն օր սպասարկվում են 68 միլիոն հաճախորդներ:
