Թուրքիայի խորհրդարանում հեռուստառադիոընկերությունների աշխատանքի արդոյւնավետության հետ կապված քննարկման ժամանակ «Ազգայնական շարժում» (MHP) պատգամավոր Ֆարուք Բալը պահանջել է, որ պետական TRT հեռուստաընկերությունը հաղորդումներ պատրաստի ընդդեմ Հայոց ցեղասպանության 100-րդ տարելիցի միջոցառումների դեմ։

Ստամբուլի հայկական «Ակոս»-ի փոխանցմամբ՝ Քոնիայից ընտրված «Ազգայնական շարժում» կուսակցության պատգամավոր Ֆարուք Բալը պնդել է, թե պետական բյուջեից սնվող TRT հեռուստաընկերությունը պետք է հասարակության օգտին աշխատի։ Նա պահանջել է, որ Հայոց ցեղասպանության 100-րդ տարելիցին նվիրված միջոցառումների դեմ TRT-ն ծրագրեր եւ հաղորդումներ պատրաստի։

Քննարկման մասնակիցներից Սըրրը Սուրեյա Օնդերը շեշտել է, թե TRT-ն ժողովրդի հարկերով է սնվում, սակայն իրականում չի ներկայացնում հասարակության բոլոր հատվածներին՝ նկատի ունենալով ազգային եւ կրոնական փոքրամասնություններին։ Նա նշել է, թե TRT-ն ամեն անգամ դառնում է իշխանությունների գործիքը եւ պնդել, որ անհրաժեշտ է եթերից հանել TRT 1-ը։