Գյումրիում հուլիսի 28-ի լույս 29-ի գիշերը դանակահարության 2 դեպք է տեղի ունեցել:
Գյումրիի բժշկական կենտրոն հուլիսի 28-ին ժամը 22:30-ին տեղափոխվել է Ավզոնոց թաղամասի Լալայան 32 հասցեի բնակիչ, 22-ամյա Ջորջ Սանթրոսյանը՝ կրծքավանդակի հատվածում չորս կտրած-ծակած վերքերով:
NEWS.am-ի հետ զրույցում հիվանդանոցի փոխտնօրեն Արմեն Խաչատրյանն ասաց, որ բժշկական հետազոտություններ անցնելուց հետո պարզվել է, որ տուժածի սրտապարկում արյուն է լցված: Ստանալով առաջին բուժօգնություն՝ երիտասարդը տեղափոխվել է Երեւանի «Էրեբունի» բժշկական կենտրոն:
Մոտ 3 ժամ անց նույն հիվանդանոց է տեղափոխվել դանակահարված երկու երիտասարդ՝ Կնունյանց հասցեի բնակիչ, 28-ամյա Կարեն Կնյազյանն ու նրա տարեկից Հովհաննես Հարությունյանը՝ մարմնի տարբեր հատվածներում կտրած-ծակած վերքերով:
Տուժածների մոտ կյանքին վտանգ սպառնացող վերքեր չեն հայտնաբերվել, նրանք ստացել են ամբուլատոր բուժում ու դուրս գրվել:
NEWS.am-ի տեղեկություններով՝ երիտասարդներին դանակահարել է Հովհաննես Հարությունյանի եղբայր՝ Հարություն Հարությունյանը, որը Բուլվարային թաղամասի 206-014 տնակում կենցաղային հարցերի շուրջ վիճաբանել է եղբոր եւ նրա ընկերոջ հետ ու դանակահարել վերջիններիս:
Շիրակի մարզի քննչական բաժնում նյութեր են նախապատրաստվում:
Հիշեցնենք, որ վերջին մեկ շաբաթվա ընթացքում սա արդեն 5-րդ դեպքն է Գյումրիում: Շիրակի ոստիկանապետ Վարդան Նադարյանը NEWS.am-ի հետ զրույցում ավելի վաղ պնդել էր, որ Գյումրիում հանցագործության աճ չկան, ընդամենը զուգադիպություն է: