ՀՅԴ Եվրոպայի Հայ Դատի Հանձնախումբը հոկտեմբերի 15-ին հետեւելու է ՄԻԵԴ-ում «Փերինչեքն ընդդեմ Շվեյցարիայի» գործով դատական վճռի հրապարակմանը: Այս մասին NEWS.am-ի թղթակցի հետ զրույցում ասաց Եվրոպայի Հայ դատի գրասենյակի հաղորդակցության պատասխանատու Բեդո Դեմիրճյանը:
«Մենք հետեւելու ենք դատական նիստին Ստրասբուրգում, ինչպես եւ հունվարին, ներկա ենք լինելու վճռի հրապարակմանը: Այս պահին սպասելիքների եւ հետագա քայլերի մասին խոսել չենք կարող: Սպասում ենք դատավճռի հրապարակմանը»,- ասաց Բեդո Դեմիրճյանը:
Նշենք, որ Մարդու իրավունքների եվրոպական դատարանը «Փերինչեքն ընդդեմ Շվեյցարիայի» գործով դատական վճիռ կկայացնի հոկտեմբերի 15-ին՝ Ստրասբուրգում հանրային լսումների ժամանակ։
Հիշեցնենք, որ 2008թ. Շվեյցարիայի դատարաններից մեկը դատապարտել էր Թուրքիայի աշխատավորական կուսակցության առաջնորդ Դողու Փերինչեքին Հայոց ցեղասպանությունը հերքելու համար։ Փերինչեքը դիմել էր ՄԻԵԴ, եւ անցյալ տարվա դեկտեմբերին եվրոպականմ դատարանը հաստատել էր Շվեյցարիայի դեմ նրա հայցը։ Շվեյցարիան բողոքարկել էր որոշումը ՄԻԵԴ-ում։
Ստրասբուրգում հունվարի 28-ին տեղի էր ունեցել «Փերինչեքն ընդդեմ Շվեյցարիայի» գործով նիստը։ Հայաստանը գործում (Perincek v. Switzerland, App. no. 27510/08) ներգրաված է որպես երրորդ կողմ։
Հայաստանի շահերը ՄԻԵԴ-ում պաշտպանում էին հանրահայտ փաստաբաններ Ջեֆրի Ռոբերթսոնը, Ամալ Ռազմի Քլունին, Թոբի Քոլիսը։
