Խորհրդարանն այսօր 3-րդ եւ վերջին ընթերցմամբ ընդունեց Ընտրական օրենսգրքի նախագիծը։ Առաջին եւ երկրորդ ընթերցումների միջեւ նախագծում մի շարք փոփոխություններ են կատարվել, իսկ երրորդ ընթերցումից առաջ կատարվել են միայն խմբագրական փոփոխություններ:
Կառավարության աշխատակազմի ղեկավար-նախարար Դավիթ Հարությունյանը եզրափակիչ ելույթում նշեց, որ եթե լինեն իրագործելի առաջարկներ, իրենք պատրաստ են հունիսի 1-ից հետո էլ ԱԺ արտահերթ նիստ հրավիրել եւ փոփոխություններ առաջարկնել:
Ապրիլյան պատերազմում կորցրած օգտագործվող տարածքները կազմում են ընդամենը 20 եւ 30 հեկտար են՝ հյուսիսում եւ հարավում՝ ասել է Ղարաբաղյան պատերազմի մասնակից, նախկին հետախույզ Վովա Վարդանովը: Իսկ 800 հեկտարը, որի մասին խոսում են, խրամատների միջեւ ընկած չեզոք գոտին է: Հատախույզի կարծիքով՝ մեկ դիրքը չի կարող կարեւոր ռազմավարական նշանակություն ունենալ, բայց դա հսկայական մարտավարական եւ օպերատիվ նշանակություն ունի:
ԱԺ պատգամավոր, ազատամարտիկ Ռուստամ Գասպարյանը համաձայն է նախագահի դիրքորոշման հետ, որ կորցրած տարածքները հետ բերելու չարժեր ռազմական գործողությունները շարունակել եւ մարդկային նոր կորուստներ ունենալ: Ազատամարտիկի կարծիքով՝ այդ տարածքները կարելի է հետ բերել հետագայում՝ ավելի քիչ կորուստներով: Ապրիլյան պատերազմի ելքը Հայաստանի համար Ռուստամ Գասպարյանը պարտություն չի համարում, քանի որ Ադրբեջանն օգտագործել է իր ամբողջ հզորությունը, հարձակվել է գիշերը գաղտագողի, եւ կարողացել է ընդամենը մի քանի բարձունք առաջ գնալ:
Քառօրյա պատերազմի օրերին զոհված երեք զինծառայողի ընտանիքներին բնակարաններ կտրամադրվեն: Երեւանի ավագանու որոշումով՝ բնակարաններ կստանան կամավոր Սարգիս Խալափյանի, պայմանագրային զինծառայող Հրաչյա Մուրադյանի, ժամկետային զինծառայող Մանվել Գեւորգյանի ընտանիքները, որոնք վարձով են բնակվում: Ընդ որում, երկուսը՝ Սարգիս Խալափյանն ու Հրաչյա Մուրադյանը երեխաներ ունեն:
Գագիկ Բեգլարյանը պնդում է, որ թիկնապահներ չունի եւ կապ չունի նախարարության հարակից բակում մայիսի 16-ին տեղի ունեցած ծեծկռտուքի հետ: Հիշեցնենք, որ մայիսի 16-ին տեղի ունեցած ծեծկռտուքի գործով երեկ 4 մարդ է կալանավորվել , որոնք, ըստ մամուլի հրապարակումների, Գագիկ Բեգլարյանի թիկնապահներն են:
Տավուշի մարզում մայիսի 21-ին արտառոց դեպք է տեղի ունեցել: «Ոսկե ձկնիկ» ռեստորանի մոտ մարզի դատախազի տեղակալ Հայկուշ Բաղդասարյանը մեքենայով ընկել է լիճը: Տեղեկությունը եւ լուսանկարները NEWS.am-ին տրամադրել են ականատեսները: Ըստ աղբյուրի՝ Տավուշի դատախազը հյուրեր ուներ գլխավոր դատախազությունից, որոնց համար իր տեղակալի հետ հյուրասիրություն էր կազմակերպել նորաբաց ռեստորանում: Դեպքը տեղի է ունեցել խնջույքից հետ, թե ինչ հանգանքներում, դեռ պարզ չէ:
Շիրակի մարզի Սառնաղբյուր գյուղում ինքնասպանություն է եղել: Որսորդական հրացանից ինքնասպան է եղել 60-ամյա Վրեժ Շաբոյանը, որին մի քանի ամիս առաջ ավազակային հարձակման մեղադրանք էր առաջադրվել: Նրա դին հայտնաբերել են որդիները ավտոտնակում։ Վրեժ Շաբոյանին մեղադրում էին ամիսներ առաջ եզդիներից 4 գառ գողանալու մեջ: Նրա հարազատների խոսքով՝ 60-ամյա տղամարդը նման բան չի արել, նա ընդամենը պաշտպանվելու նպատակով կրակել էր հոտը հսկող շների վրա: հարազատները կարծում են, նա ինքնասպան է եղել , քանի որ շատ ծանր էր տանում իրեն ներկայացված մեղադրանքը:
Ադրբեջանում ազատ է արձակվել «Ազատություն» ռադիոկայանի թղթակից Խադիջա Իսմալյովան: Քաղաքական ակտիվիստին ազատել են պայմանական-վաղաժամկետ: : Խադիջա Իսմայլովան դատապարտվել էր անցած տարի՝ գործընկերոջը ինքնասպանության հասցնելու մեղադրանքով: Սակայն միջազգային հանրությունը կոշտ քննադատության էր ենթարկում Ալիեւին՝ նշելով, որ լրագրողն իրականում քաղաքական հետապնդման զոհ է, քանի որ բացահայտումներ էր արել Ալիևի ու նրա ընտանիքի անդամների բիզնեսների վերաբերյալ: Իսմայլովայի գործն այժմ եվրոպական դատարանում է, նրա շահերը պաշտպանում է Ամալ Քլունին:
Ռուսաստանը Ուկրաինային է հանձնել ուկրաինուհի օդաչու Նադեժդա Սավչենկոյին: Երկու տարի Ռուսաստանի քննչական մեկուսարանում անցկացնելուց հետո Սավչենկոյին Պուտինի կողմից համաներում է շնորհվել, նրան փոխանակել են ռուսաստանցի երկու զինվորականների հետ, որոնք 2015-ին ձերբակալվել էին Լուգանսկում, եւ 14 տարվա ազատազրկման դատապարտվել Ուկրաինայի տարածքում ահաբեկչական գործողություններին մասնակցելու մեղադրանքով: Սավչենկոն ուկրաինացի ակտիվիստ է, նա գերեվարվել էր Ուկրաինայում, տեղափոխվել Ռուսաստան, որտեղ նրան մեղավոր էին ճանաչել Լուգանսկում ռուս լրագրողների սպանությանը մասնակցելու մեջ, դատապարտել 22 տարվա ազատազրկման:
Դոլարի, ռուբլու, ֆունտի փոխարժեքները աճել են, եվրոյինը՝ նվազել: Դոլարի փոխարժեքը կազմել է 477, ռուբլունը 7.25, եվրոյինը՝ 532, ֆունտինը՝ 698 դրամ:
Երեւանում մայիսի 26-ի գիշերվա առաջին կեսին եւ երեկոյան ժամերին սպասվում է կարճատեւ անձրեւ եւ ամպրոպ: Առաջիկա գիշերը մայրաքաղաքում օդի ջերմաստիճանը կհասնի +13-ի, իսկ վաղը ցերեկը՝ +28-ի։