Գերմանիայի կանցլեր Անգելա Մերկելն այսօր Բեռլինում ընդունել է Ադրբեջանի նախագահ Իլհամ Ալիեւին: Քննարկման գլխավոր թեման ղարաբաղյան հակամարտությունն էր: Մերկելը կարեւորել է ոչ միայն հրադադարը պահպանելը, այլեւ քաղաքական գործընթացում առաջընթաց գրանցելը: Մերկելի խոսքով՝ իրենց նպատակը միասնական փաթեթի ընդունումն է, որով քայլ առ քայլ կկարգավորվի հակամարտությունը մադրիդյան սկզբունքների հիման վրա:

Ալիեւը, իր հերթին, անդրադարձել է Ադրբեջանին ռուսական զենքի վաճառքի շուրջ քննարկումներին եւ նշել, որ Ռուսաստանը, որպես զենքի մեծ մատակարար, ճիշտ է վարվում: Իսկ Ադրբեջանը զենք է գնում ոչ միայն Ռուսաստանից, այլեւ Բելառուսից, Իրանից, Իսրայելից, Թուրքիայից: Ավելին՝ Ալիեւը հույս է հայտնել, որ Մոսկվան Հայաստանին կհամոզի Ադրբեջանին վերադարձնել տարածքները:

Շուշիի առանձնակի գումարտակի հրամանատար Ժիրայր Սեֆիլյանը համերաշխության կոչ է հղել Արցախի ՊԲ նախկին ու ներկա հրամանատարներ Սամվել Բաբայանին եւ Լեւոն Մնացականյանին՝ ասլով, որ նրանց հակասությունը խարխլում է ժողովրդի եւ բանակի հավատը, թուլացնում պաշտպանունակությունը, ինչը կարող է անդառնալի ծանր հետեւանքներ ունենալ Արցախի ու համայն հայության համար: Ըստ Սեֆիլյանի՝ այս օրհասական պահին, երբ հակառակորդը հերթական հարձակումն է պատրաստում, անհրաժեշտ է համազգային միասնություն:

Նախօրեին Բակո Սահակյանը հանդիպել է քառօրյա պատերազմի ժամանակ Թալիշ գյուղից տեղափոխված բնակիչների հետ: Հանդիպումը կայացել է Չարենցավանում, որտեղ ժամանակավոր բնակություն է հաստատել թալիշցիների մեծ մասը: Հանդիպման գլխավոր թեման թալիշցիների հետագա բնակեցման հարցն էր:  Արցախում ապաստանած թալիշցիները կտեղափոխվեն Քոլատակ եւ Կիչան գյուղեր, որտեղ այժմ շինարարական աշխատանքներ են ընթանում: Մի մասին էլ ժամանակավորապես կտեղավորեն Ալաշան գյուղում, ապա երբ տների շինարարությունն ավարտվի, բոլորը կտեղափոխվեն Մարտակերտի շրջանի Նոր Կիլիկիա գյուղ:  Թալիշցիները NEWS.am-ի հետ զրույցում ասել են, որ որտեղ էլ լինի, իրենք ցանկանում են համագյուղացիներով միասին լինել, որպեսզի հետագայում բոլորով վերադառնան Թալիշ:

Զինծառայողներին մեղադրանք է առաջադրվել՝ վաշտի հրամանատարին ծեծելու համար։ Քննչական կոմիտեի տվյալով՝  մայիսի 16-ին երեկոյան վաշտը ստուգելիս կապիտան Խաչատրյանը պարզել է, որ շարքում ալկոհոլ օգտագործած զինծառայողներ կան, ինչի մասին զեկուցել է գումարտակի հրամանատարին, ապա պահանջել, որ շարքից դուրս գան ալկոհոլ օգտագործած զինծառայողները: Վեց զինծառայող դուրս է եկել շարքից եւ վիճել նրա հետ, ապա ձեռքերով, ոտքերով հարվածել նրան։ Նրանք բոլորը   կալանավորված են:

Գագիկ Ջհանգիրյանն այսօր Ազգային ժողովում պահանջել է դադարեցնել զինծառայողներին ստորացնող պրակտիկան, երբ հատկապես ապրիլյան պատերազմից հետո պաշտոնյաներին, մեծահարուստներին եւ մշակութային գործիչներին զորամասերում դիմավորում են շարահրապարակում շարված զինվորական ստորաբաժանումները:

Նաիրա Զոհրաբյանը անդրադարձել է Հայաստանում եվրոպական վիզաներ տրամադրող կենտրոնների գործունեությանը: Դրանք վերածվել են իսկական գետտոների, որտեղ մարդկանց նվաստացնում են եւ տասնյակ հազարավոր գումարներ գանձում: Պագամավորը պահանջում է վերջ տալ այս գործելաոճին:

Ազգային ժողովում բարձր տրամադրությունն այսօր ապահովել է Նիկոլ Փաշինյանը: 2015թ. բյուջեի կատարողականի քննարկման ժամանակ կառավարության անգործությունը ավելի պատկերավոր նկարագրելու համար Փաշինյանը հիշեցրել  «Կարգին հաղորդման» մանրապատումներից մեկը:

Այսօր Ադրբեջանի քաղաքացի է հատել հայ-ադրբեջանական սահմանը՝ Մեհրաբի ուղղությամբ: 39-ամյա Վալիեւա Զոհրա Վարձար- քըրզեն Թովուզի շրջանի Յանըխլը գյուղից է: Ստուգումներ են կատարվում նրա մասին լրացուցիչ տվյալներ , նաև հայկական կողմն անցնելու հանգամանքները պարզելու նպատակով: Զոհրա Վելիեւային հայտնաբերելու մասին համապատասխան կարգով տեղեկացրել են Կարմիր խաչի  երեւանյան գրասենյակին:

Հովիկ Աբրահամյանի հրամանով  իր սեփական դիմումի համաձայն պաշտոնից ազատվել է Հայաստանի Քաղաքացիական ավիացիայի գլխավոր վարչության պետ Արտյոմ Մովսեսյանը: Նա այդ պաշտոնը զբաղեցնում էր 2004 թվականից։

Նոր մանրամասներ են հայտնի դարձել Երեւանում հունիսի 4-ին տեղի ունեցած սպանության մասին: 58-ամյա Եղիշե Խաչատրյանին սպանել են մոր աչքի առջեւ: Դեպքը տեղի է ունեցել Նուբարաշենի «ավտոշուկայի» մոտ: Ըստ շրջանառվող տեղեկությունների՝ վեճի պատճառը եղել է ճանապարհը միմյանց չզիջելը: Եղիշեն նկատողություն է արել մյուս մեքենայում նստած երիտասարդներին, որոնք էլ դաժան ծեծի են ենթարկել նրան, ապա թողել են ընկած ու փախուստի դիմել: Ընդ որում, այդ ամենը տեղի է ունեցել տուժողի մոր աչքի առջեւ, որը որդու մեքենայի մեջ է եղել: Մինչեւ «Շտապօգնության» գալը Եղիշեն մահացել է: Նա հայտնի լեզվաբան Փառանձեմ Մեյթիխանյանի ամուսինն է: Ոստիկանությունն այժմ որոնում է փախուստի դիմած երիտասարդներին, որոնք, ըստ շրջանառվող լուրերի, Նոր Արեշի բնակիչներ են:

Սոցիալապես անապահով ընտանիքների երեխաների համար բուհերում հատուկ անվճար տեղեր կբացվեն: Կրթության եւ գիտության նորանշանակ նախարարը հույս ունի իր այս ծրագիրը գործարկել արդեն հաջորդ ուսումնական տարում: Լեւոն Մկրտչյանն այլ փոփոխություններ էլ է նախատեսում՝ ոչ պետական բուհերի խոշորացում, ուսուցիչների մրցույթի կարգի փոփոխություն՝ կոռուպցիոն ռիսկերը վերացնելու նպատակով, 12-րդ դասարանցիների ուսումնական ծրագրի բեռնաթափում, լրացուցիչ անվճար տեղեր՝ բնագիտական մասնագիտությունների համար: 

Նախարարը, որն այսօր ներկա էր Հայոց լեզվի միասնական քննությանը, նկատել է՝ նախորդ տարիների համեմատ նվազել է լարվածությունը  դիմորդների եւ նրանց ծնողների մոտ: Պատճառը թերեւս մրցակցության բացակայությունն է: Նախորդ տարվա համեմատ՝ դիմորդների թիվը նվազել է 400-ով ու դիմորդները գիտեն, որ նվազագույն գիտելիքներով էլ կարող են բուհ ընդունվել: Այնուամենայնիվ, նախարարը հարկ է համարել հանգստացնել դիմորդներին:

Քննությունից հետո դիմորդները նշել են, որ Շտեմարանում հայտնաբերված վրիպակները չեն շտկվել եւ կրկնվել են քննական թեստերում: Ծնողների դժգոհության հիմնական պատճառը դրսում տեղադրված էկրաններն էին, որոնք քննասենյակից պատկերը հստակ չեն հաղորդում, բացի դրանից յուրաքանչյուր ծնողի ընդամենը 10 րոպե են թույլ տալիս մնալ էկրանի դիմաց: Ի դեպ, քննական կարգը խստացվել էր: Դիմորդներից քննասենյակ մտնելիս հավաքեցին քննությանը չառնչվող բոլոր իրերը՝  այդ թվում ջուրը եւ քաղցրավենիքը: 

Դոլարը, եվրոն ու ռուբլին արժեւորվել են: Դոլարի փոխարժեքը կազմել է 478, եվրոյինը՝ 544, ֆունտինը՝ 697, իսկ ռուբլունը՝ 7.36 դրամ:

Հունիսի 8-ին օդի ջերմաստիճանը կնվազի 4-5 աստիճանով: Երեւանում  ժամանակ առ ժամանակ սպասվում է անձրեւ եւ ամպրոպ, հնարավոր է նաև կարկուտ: Առաջիկա գիշերը մայրաքաղաքում սպասվում է +14+16, իսկ վաղը ցերեկը՝ +24+26 աստիճան տաքություն։