Իշխանությունները որոշել են մասնակիորեն ընդառաջել ընդդիմությանը եւ հրապարակել համապետական ընտրություններին քվեարկածների ցուցակները: Ընտրական օրենսգրքում համապատասխան փոփոխությունների նախագիծը կառավարությունն ուղարկել է խորհրդարան, որն այդ հարցը կքննարկի առաջիկա արտահերթ նիստին: Այնումենայնիվ, ընտրությունների թափանցիկություն ապահովող այն արդյունքը, որն ակնկալում էր ընդդիմությունը, ցուցակների հրապարակմամբ չի ապահովվի: Հրապարակվելիք ցուցակները լինելու են ոչ պաշտոնական եւ որեւէ ռեկվիզիտ չեն պարունակելու:

Ընդդիմության մյուս պահանջը՝ ընտրատեղամասերից ուղիղ հեռարձակում ապահովելու վերաբերյալ, նույնպես որոշակիորեն բավարարվել է:Կենտրոնական ընտրական հանձնաժողովն ինքը կապահովի ուղիղ հեռարձակում հատուկ ստեղծված կայքի միջոցով: Ընդ որում՝ շահարկումներից խուսափելու համար ուղիղ հեռարձակումը կպատվիրի անկախ կազմակերպության, որը կընտրվի մրցույթով:

Կառավարությունն արտոնություններ է տվել Սյունիքի մարզպետ Սուրիկ Խաչատրյանին: Նրա ընտանիքին պատկանող «Խաչատրյան  եղբայրներ» ընկերությունը երեք տարով ազատվել է ներկրած սարքավորումների համար ԱԱՀ-ից:  Սյունիքի մարզպետն այդ սարքավորումները Չինաստանից ներկրում է Ծղուկ գյուղում կառուցվելիք հիդրոէներգոկասկադի համար: Այդ նպատակով նա մտադիր է ծախսել մոտ մոտ 2 միլիարդ դրամ, որից 489 մլն-ը փաստորեն երեք տարով ազատվում է ԱԱՀ-ից: Նշենք, որ կառավարությունը Սուրիկ Խաչատրյանին ընդառաջել է մի նախագծի համար, որը ապագայում ընդամենը 14 աշխատատեղ է ապահովելու՝ 120 հազար դրամ աշխատավարձով:

Կառավարությունը որոշել է դարն ապրած մեքենաները վաճառելով բյուջե լցնել: Գործադիրը տարբեր նախարարություններից վերցրել է հիմնականում ՎԱԶ, ԳԱԶ եւ ՈւԱԶ մակնիշի 383 մեքենա, որոնք ապագայում աճուրդի կհանվեն եւ ստացված գումարով կհամալրվի բյուջեն:

Ապրիլյան պատերազմի ժամանակ ողնուղեղի վնասվածք ստացած երկու զինծառայողներին առողջապահության նախարարությունը արտասահման բուժման ուղարկելու հարցը չի քննարկում, քանի որ պաշտպանության նախարարությունից համապատասխան դիմում չի ստացել՝ լրագրողներին ասել է նախարար Արմեն Մուրադյանը: Ավետիս Զարգարյանի եւ Ռոլանդ Սահակյանի վիճակը շարունակում է մնալ ծանր, երկուսն էլ արդեն մոտ երեք ամիս անշարժ պառկած են կենտրոնական հոսպիտալում Վերակենդանացման բաժանմունքում: Ընդ որում, Արմեն Մուրադյանը շարունակում է պնդել, որ վիրավորված զինծառայողներին արտասահման ուղարկելու կարիք չկա, եւ որ հայ բժիշկներն ի վիճակի են նույն որակի բուժում իրականացնել: Իսկ ինչ վերաբերում է Արման Լազգիյանին, որի վիճակումը Գերմանիա տեղափոխվելուց հետո դրական դինամիկա կա, նախարարը վստահեցնում է, որ նույն դինամիկան կլիներ Հայաստանում մնալու դեպքում:

Արտառոց դեպք է տեղի ունեցել Երեւանում: Այգեձորի տներից մեկում փրկարարները գտել են 80-ամյա Իվետա Սարգսյանի կմախքը: Հարազատներն ահազանգել են, որ տեւական ժամանակ նրանից լուր չունեն: Փրկարարները բացել են բնակարանի դուռը եւ մահճակալի մոտ հայտնաբերել Իվետա Սարգսյանի կմախքը: Տան ներսում եղել են սատկած առնետներ եւ մկներ: Նախնական եզրակացությամբ` մահը վրա է հասել մոտ 1 տարի առաջ կամ ավելի վաղ: Դիակը տեղափոխելիս գլուխն անջատվել է մարմնից:

Բալի ծառից մետաղյա ձողի վրա ընկած ու հրաշքով փրկված Անդրանիկ Վարդանյանն արդեն ապաքինվում է: Ծանր վիրահատությունից հետո հիվանդասենյակ տեղափոխված 59-ամյա տղամարդը հումորով է պատմում իր հետ կատարվածի մասին:  Երկու մետրից ավելի երկարությամբ ձողը կտրել անցել է նրա որովայնը, բայց նա խուճապի չի մատնվել: Ինչպես ինքն է ասում՝ որպես փորձառու «դզող-փչող»՝ հարեւաններին հրահանգել է՝ ինչպես որովայնի մեջ մնացած ձողը կտրեն, որպեսզի փրկարարները հետ առանց դրա վրա ժամանակ կորցնելու իրեն հիվանդանոց տեղափոխեն:

 Այսօր բոլոր հիմնական արտարժույթների փոխարժեքները բարձրացել են, եվրոյինն ու ֆունտինը՝ զգալիորեն: Եվ այսպես, դոլարի փոխարժեքը կազմել է 476, ռուբլունը՝ 7.44, եվրոյինը՝ 542, ֆունտինը՝ 707 դրամ:

Երեւանում հունիսի 24-ին օրվա երկրորդ կեսին, սպասվում է կարճատեւ անձրեւ: Առաջիկա գիշերը մայրաքաղաքում օդի ջերմաստիճանը կհասնի  +20-ի, իսկ վաղը ցերեկը՝ +32–ի։