Օգոստոսի 5-ի երեկոյան ազատ է արձակվել զանգվածային անկարգություններ կազմակերպելու կասկածանքով ձերբակալված երաժիշտ Եղիշե Պետրոսյանը: Լուսինե Սահակյանի խոսքով՝ Եղիշե Պետրոսյանի նկատմամբ քրեական հետապնդումը դադարեցվել է հանցակազմի բացակայությաքն պատճառաբանությամբ:
Այսօր առավոտյան «Էրեբունի» հիվանդանոցի դիմաց հավաքվել են մի խումբ քաղաքացիներ՝ իրենց զորակցությունը հայտնելու հիվանդանոցում գտնվող «Սասնա ծռերի» երեք անդամներին: Նրանք իրենց մտահոգությունն են հայտնել նաեւ «Դատապարտյալների հիվանդանոցում» գտնվող «Սասնա ծռերի» 4 անդամների առողջության առնչությամբ: «Էրեբունի» հիվանդանոցի դիմաց ցուցարարների հետ զրուցել է հիվանդանոցի տնօրեն Միքայել Մանուկյանը, որը տեղեկացրել է, որ Թաթուլ Թամրազյանին եւ Արմեն Լամբարյանին վիճակը լավացել է, նրանք տեղափոխվել են հիվանդասենյակ, իսկ Սեդրակ Նազարյանը շարունակում է մնալ Վերակենդանացման բաժանմունքում, նրա վիճակում դրական տեղաշարժ կա: Մանուկյանը վստահեցրել է նաեւ, որ «Դատապարտյալների հիվանդանոցում» բուժվողները ստանում են անհրաժեշտ բուժօգնություն։
Թաթուլ Թամրազյանին եւ Արմեն Լամբարյանին Վերակենդանացման բաժանմունքց հիվանդասենյակ տեղափոխվելուց անմիջապես հետո առաջադրվել է մեղադրանք։ Նրանց տարել են դատարան՝ նրանց նկատմամբ խափանման միջոցը որոշելու համար: Արմեն Լամբարյանին դատարան են մտցրել պատգարակով, կալանավորելուց հետո տեղափոխել Դատապարտյալների հիվանդանոց։ Մինչեւ այդ Լամբարյանը հայտարարել էր , որ պահանջում է պատասխանատվության ենթարկել իր դեմ մահափորձ կատարողին: Հիշեցնենք, որ Արմեն Լամբրյանը վիրավորվել եւ ՊՊԾ տարածքից դուրս էր բերվել հուլիսի 29-ին:
Նախօրեին հիվանդանոցից դուրս է գրվել 17-ամյա Սայադ Հարությունյանը, որը հուլիսի 29-ին Սարի թաղի դեպքերի հետեւանքով զրկվել էր աչքից: «Սուրբ Գրիգոր Լուսավորիչ» հիվանդանոցը, որտեղ բուժում էր ստանում Սայադը, ստանձնել է 17-ամյա պատանու բուժման բոլոր ծախսերը եւ արդեն պատվիրել է աչքի պրոթեզը:
Մայրաքաղաքի հիվանդանոցներում այս պահին բուժում է ստանում Սարի թաղի դեպքերից տուժած 12 մարդ՝ այդ թվում մեկ լրագրող: Հուլիսի 17-ին վիրավորված Գագիկ Մկրտչյանի վիճակը շարունակումէ մնալ ծանր: «Սասնա ծռեր» խմբի անդամներից քաղաքացիական հիվանդանոցում բուժում է ստանում միայն հուլիսի 31-ին ՊՊԾ տարածքում վիրավորված Սեդրակ Նազարյանը:
Շամշադինում դիրքեր գնալու ճանապարհին վթարի է ենթարկվել զինծառայողներին տեղափոխող մեքենան, ինչի հետեւանքով մահացել է ժամկետային զինծառայող 19-ամյա Դավիթ Սաֆարյանը: Դավիթը Երեւանի բնակիչ էր, 6 ամսվա զինծառայող:
Խոշոր վթար է տեղի ունեցել Դավիթաշենում։ Տաքսի ծառայության մեքենան բախվել է «Մերսեդեսին», որը դուրս է եկել երթեւեկելի հատվածից եւ հայտնվել կանգառում՝ վրաերթի ենթարկելով քաղաքացիների։ Երկու մարդ տեղափոխվել է հիվանդանոց։ Նրանցից մեկը՝ 30-ամյա պատմաբան, երաժիշտ Կարո Ժամհարյանը, մահացել է հիվանդանոցի ճանապարհին։
Այսօրվանից Հայաստանի քաղաքացիները կարող են առանց վիզայի մուտք գործել Իրանի տարածք: Հայաստանում Իրանի դեսպան Սեյեդ Քազեմ Սաջադին Հովիկ Աբրահամյանի հետ հանդիպմանն ասել է, որ այսօր Իրանի բոլոր սահմանային անցակետերին համապատասխան հրաման է տրվել:
