Արցախի Քաշաթաղի «Տաք ջրեր» կոչվող լիճը, որտեղ գարնանը 3 երիտասարդ էր խեղդվել, չի բացառվում` վերաբացվի:
NEWS.am-ի թղթակցի հետ զրույցում Քաշաթաղի վարչակազմի աշխատակիցներից հայտնեցին, որ այս պահին լիճը փակ է այցելուների համար. ցանկապատվել է, կողպվել, իսկ տարածքն էլ պահակ է հսկում:
«Եթե վերանորոգվի բասեինի պատը, կվերաբացվի, իսկ քանի պատը քանդված է, վերաբացման մասին խոսք լինել չի կարող»,- ասաց աշխատակիցներից մեկը:
Նշենք, որ նախնական տեղեկություններով, երիտասարդները խեղդվել են լճից դուրս եկող գազից:
Ավելի վաղ NEWS.am-ը հայտնել էր, որ 2016թ. մայիսի 21-ին ողբերգական դեպք է տեղի ունեցել Քաշաթաղի «տաք ջրեր» կոչվող լճում: Երեք երիտասարդ դեռեւս չպարզված հանգամանքներում խեղդվել են: Նրանցից մեկը Բերձորից էր, մյուս երկուսը՝ Գորիսից:
