2017 թվականի պետբյուջեի նախագծի քննարկումները խորհրդարանում շարունակվել են նաեւ այսօր: Ներկայացվել է մի շարք ոլորտներում հատկացումների չափը, նաեւ նշվել խնայողությունների եւ կրճատումների մասին:
2017 թվականին Հայաստանի խորհրդարանի ծախսերի համար 4․3 մլրդ դրամ կհատկացվի, կառավարության ծախսերը կկազմեն 11.6 մլրդ դրամ, նախագահի աշխատակազմի ծախսերը՝ 4.5 մլրդ դրամ: Նախագահի աշխատակազմի ղեկավարին հարցրել են ծախսերի կրճատման հնարավորության մասին՝ հաշվի առնելով, որ անցում ենք կատարում կառավարման խորհրդարանական համակարգի: Արմեն Գեւորգյանը հիշեցրել է. նախագահի լիազորությունները կպահպանվեն մինչեւ պաշտոնավարման ավարտը՝ 2018 թվականի ապրիլը, հետեւաբար հաջորդ տարի նույնպես նախագահի աշխատակազմի ծախսերը շատ չեն կրճատվի:
Խնայողությունը՝ խնայողություն, բայց չինովնիկները տասնյակ կիլոմետրեր հեծանիվով չեն գնալու մարզեր։ Դավիթ Հարությունյանի արձագանքն է եղել ծառայողական մեքենաների կրճատմանը: Առանց այն էլ՝ 2016 թվականին Կառավարության ավտոպարկում արդեն 26 մեքենա է կրճատվել:
Լրագրողների ուշադրության կենտրոնում են եղել նաեւ մարզպետերը: Գեղարքունիքի մարզպետին հարցրել են Վարդենիսի քաղաքապետ Վոլոդյա Խլոյանին ծեծելու մասին: Պարզվում է՝ մարզպետն այդ մասին լրատվամիջոցներից է իմացել:
Սյունիքի մարզպետից էլ հետաքրքրվել են մարզում տիրող մթնոլորտի մասին: Վահե Հակոբյանը վստահեցրել է. հոգեբանական մթնոլորտը գերազանց է: Իսկ մարզպետարանում կադրային մեծ փոփոխություններ չեն նախատեսվում:
Հայոց ցեղասպանության փաստի ժխտումը պետք է դիտարկել որպես հանցագործություն: Բելգիայի Սենատի ներկայացուցիչ Քրիսթին Դեֆրենի կարծիքն է: Երեւանում Գալուստ Սահակյանի հետ համատեղ ճեպազրույցում նա հավաստել է, որ շարունակելու են աշխատել՝ Բելգիայի խորհրդարանի կողմից Հայոց ցեղասպանության ժխտման համար քրեական պատասխանատվություն սահմանելու համար:
Անդրադառնալով ղարաբաղյան հիմնախնդրի թեմային՝ բելգիացի սենատորը նշել է, որ նման հակամարտությունները պետք է կարգավորվեն միայն ու միայն խաղաղ ճանապարհով:
Պաշտոնին հրաժեշտ է տվել հարկային ծառայության, թերեւս, ամենահին պաշտոնյան: Նոյեմբերի 1-ին պաշտոնից ազատվելու դիմում է ներկայացրել Պետեկամուտների կոմիտեի փոխնախագահ Արմեն Ալավերդյանը: Նա հարկային ծառայությունում աշխատել է 1991 թվականից, իսկ տեղակալի պաշտոնը զբաղեցնում է 1995-ից։ Վարչապետի պաշտոնում Կարեն Կարապետյանի նշանակվելուց հետո սկսեցին լուրեր պտտվել, որ Ալավերդյանը նույնպես հեռանալու է պաշտոնից։
Երեւանում բոտուլիզմի դեպք է արձանագրվել՝ 4 տուժածով: Նրանք մեկ ընտանիքի անդամներ են: Տուժածներից մեկը՝ 70-ամյա կին, հիվանդանոցում մահացել է: Բոլորն էլ տնային պայմաններում պատրաստված կանաչ տաքդեղ են կերել: Մահացած կինը չափազանց ուշ է դիմել բժշկի: Մյուս երեք տուժածները հիվանդանոցում են, նրանց վիճակը միջին ծանրության է: Առողջապահության նախարարությունը զգուշացնում է. խուսափել տնային պայմաններում պատրաստված պահածոների օգտագործումից կամ դրանից առաջ պահածոները ջերմային մշակման ենթարկել: Հարկավոր է նաեւ թունավորման առաջին ախտանշանների դեպքում անմիջապես դիմել բժշկի:
Ծննդկան Մերի Մարգարյանի եւ նորածնի մահվան գործով այսօր դատարանում ցուցմունք են տվել «Շենգավիթ» բուժկենտրոնի այն բժիշկները, որոնց վերաբերյալ քննություն է ընթանում՝ պարզելու հղիի մահվան մեջ նրանց մեղավորությունը: Վկաները միաբերան պնդել են. հիվանդանոցը ոչ մի սխալ թույլ չի տվել, արել են այն, ինչ անհրաժեշտ էր: Այնուամենայնիվ, բուժկենտրոնի մանկաբարձության եւ գինեկոլոգիայի բաժանմունքի վարիչ Աշոտ Սիրունյանը չի դիմացել. 37.8-ից բարձր ջերմության դեպքում ցանկալի է հոսպիտալացնել հղիներին: Ըստ մահացածի հարազատների՝ ամբաստանյալ Շուշանիկ Բախշյանը միայն 4-րդ օրն է համաձայնել պառկեցնել հղիին, այն էլ՝ իրենց պարտադրանքով: Ի դեպ, Շուշանիկ Բաշխյանը, պարզվում է, լիարժեք մասնագիտական կրթություն չունի: Նա վեց տարի բուժական գործ է ուսանել, ապա վեցամսյա դասընթացի մասնակցել եւ նեղ մասնագիտացում ստացել:
Երեւանում այս տարվա առաջին ձյունն է տեղացել։ Առավոտից ձյուն էր տեղում մայրաքաղաքի բարձրադիր շրջաններում, ավելի ուշ տեղումներ սկսվեցին նաեւ կենտրոնում եւ հարավում: Նոր Նորքում արդեն ձյան որոշակի շերտ է գոյացել։ Երեխաները նույնիսկ փորձել են ձնեմարդ պատրաստել: Իսկ մարզերում ձյան առատ տեղումներ են արդեն մի քանի օր շարունակ: Այսօր տեղումների պատճառով փակվել է Դիլիջանի թունելը: Այստեղ մաքրման ակտիվ աշխատանքներ են ձեռնարկել: Պատասխանատու գերատեսչությունները վարորդներին կրկին զգուշացնում են. հարկավոր է երթեւեկել բացառապես ձմեռային անվադողերով։
Նոյեմբերի 1-ին դոլարի ու եվրոյի փոխարժեքը փոքր-ինչ աճել է: Արդյունքում դոլարի փոխարժեքը կազմել է 475 դրամ, եվրոյինը՝ 522, ռուբլունը՝ 7 դրամ 52 լումա, ֆունտինը՝ 581 դրամ։
Նոյեմբերի 2-ին հանրապետության տարածքում առատ տեղումներ են սպասվում, լեռնային եւ նախալեռնային գոտիներում՝ հիմնականում ձյան տեսքով: Առանձին ճանապարհահատվածներում բուք եւ մերկասառույց կլինի: Օդի ջերմաստիճանն էապես չի փոխվի: Երեւանում վաղը ժամանակ առ ժամանակ անձրեւ է սպասվում: