Ազգային ժողովում շարունակում են քննարկել 2017 թվականի պետբյուջեի նախագիծը: Խորհրդարան եկած տրանսպորտի նախարարին ՀԱԿ-ից Արամ Մանուկյանն ահազանգել է. «Հյուսիս-Հարավ» մայրուղին դեռ չեն հասցրել ամբողջությամբ կառուցել, իսկ այն արդեն ճաքեր է տվել, նաեւ մարդիկ են զոհվել: Սակայն Վահան Մարտիրոսյանը չի շտապում գնահատական տալ թերություններին:
Նախարարը լրագրողներին վստահեցրել է, որ Հայաստանում ճանապարհաշինական ոչ մի ծրագիր, այդ թվում՝ «Հյուսիս-Հարավ» ճանապարհային միջանցքը, վտանգի տակ չէ: Պարզապես հիմա քննարկվում է ճանապարհների շատ հատվածներ մասնավոր-պետական համագործակցության շրջանակում կառուցելու հարցը: Արդյո՞ք դրա հետեւանքով ճանապարհը կարող է վճարովի դառնալ: Նախարարը սա չի բացառում:
Պետեկամուտների կոմիտեի նոր նախագահին ուղղված հարցերն էլ վերաբերել են, մասնավորապես, ստվերի դեմ պայքարին, կոմիտեում կադրային փոփոխություններին: Վարդան Հարությունյանը վստահեցրել է. եթե ստվեր կա, ինքը կարճ ժամանակում կիմանա այդ մասին եւ կպայքարի դրա դեմ, քանի որ բոլորը պարտավոր են հարկ վճարել պետությանը:
ՊԵԿ-ում փոփոխություններ, այո՛, կատարվում են, այո՛, նոր նախագահը կառույցը համալրում է իր վստահությունը վայելող անձանցով:
Գազի եւ էլեկտրաէներգիայի սակագները կնվազեն, բայց որքան, Ռոբերտ Նազարյանը դժվարանում է պատասխանել: Ասում է՝ պետք է հաշվի առնեն մի շարք գործոններ: Բայց արդեն որոշակիորեն հայտնի է, թե երբվանից նոր սակագներն ուժի մեջ կմտնեն:
Արամ Մանուկյանի խոսքով, սակայն, գազի սակագնի նվազման մասին հայտարարություններն օդից կախված են: Ասում է՝ տեսանելի չեն այն հանգամանքները, որոնց շնորհիվ սուբսիդավորվելու է գազի սակագնի նվազումը:
Այս օրերին սոցհարթակի թիվ մեկ թեման Լեւոն Ալթունյանի աղմկահարույց հայտարարությունն է: Առողջապահության նախարարի արտահայտությունը, թե ինքը «մեկ-երկու մահացած ծննդկանի դեպքով չի զբաղվում, դրանով զբաղվում են դատական մարմինները, դատավորները, մորգը», բարկացրել է ոչ միայն մահացածների հարազատներին, այլեւ հանրությանը: Խնդրին ստիպված է եղել անդրադառնալ նաեւ Կարեն Կարապետյանը՝ փորձելով փրկել մտերիմ ընկերոջը: Վարչապետն ասել է՝ «եթե նախարարը նման բան է ասել, ուրեմն ես նրան մինչ այդ չեմ ճանաչել, իսկ ես Ալթունյան Լեւոնին լավ եմ ճանաչում»:
Բայց վարչապետի գովեստի խոսքերն Ալթունյանին չեն փրկել: Երեկ ուշ երեկոյան համացանցում հայտնվել է նախարարի մամուլի խոսնակի գրառումը. Ալթունյանը պատրաստվում է ընդունել մահացած 3 ծննդկանի՝ Մերի Մարգարյանի, Տաթեւիկ Գասպարյանի եւ Հռիփսիմե Նազլուխանյանի հարազատներին:
Ինչո՞ւ հենց այս երեքի, ի՞նչ սկզբունքով է կատարվել ընտրությունը. պաշտոնական տվյալներով՝ 2015 թվականին եւ 2016-ի հունվար- հոկտեմբերին գրանցվել է մայրական մահացության 15 դեպք: Այս հարցի պատասխանը լրագրողներն այսօր փորձել են ճշտել փոխնախարար Սերգեյ Խաչատրյանից: Պատասխանը, մեղմ ասած, ծիծաղելի է: Նշենք, որ նախարարը մահացած ծննդկանների հարազատներին ընդունելու է նոյեմբերի 8-ին:
Մշակույթի նախարարը տեղյակ չէ, որ Էջմիածնի փողոցներից մեկն անվանակոչվելու է Արամ Ասատրյանի անունով: Լրագրողներն Արմեն Ամիրյանից հետաքրքրվել են, թե ինչպես է վերաբերվում այդ որոշմանը:
Արմեն Ամիրյանն անդրադարձել է նաեւ նախարարությունում իրականացվող փոփոխություններին՝ հավաստելով, որ դրանք ոչ թե նախկին նախարարի կադրերից ազատվելու, այլ նոր կառավարության ծրագիրն իրականացնելու համար են:
Ինչ վերաբերում է առաջին տպարանի շենքի պայթեցման առիթով բարձրացած աղմուկին: Մշակույթի նախարարությունը որոշել է օրենսդրական նախաձեռնությամբ հանդես գալ, ըստ որի՝ 100-ամյա պատմություն ունեցող շենքերը մշակութային արժեք կհամարվեն եւ կարգելվի դրանք քանդել:
Նոյեմբերի 8-ին ԱՄՆ-ում նախագահ են ընտրելու: Քվեարկության նախօրեին սոցհարցումների վերջին տվյալներն են հրապարակվել: Դրանց համաձայն՝ նախագահի դեմոկրատ թեկնածու Հիլարի Քլինթոնն իր հանրապետական մրցակից Դոնալդ Թրամփից առաջ է անցել 3 տոկոսային կետով. Քլինթոնին պատրաստ է աջակցել ընտրողների 44 տոկոսը, Թրամփին՝ 41 տոկոսը:
Մինչ այդ, Նեւադայում ընտրողների հետ հանդիպմանը Դոնալդ Թրամփը ստիպված է եղել ելույթի ժամանակ անհապաղ լքել ամբիոնը: Երկու թիկնապահներ Թրամփին հեռացրել են բեմից՝ նրան փակելով իրենց մարմիններով: Պատճառը դահլիճում գտնվող զինված տղամարդն է եղել, որին ձերբակալել են:
Նոյեմբերի 7-ին դոլարի վերելքը շարունակվել է, իսկ եվրոն փոքր-ինչ թուլացրել է դիրքերը: Արդյունքում դոլարի փոխարժեքը կազմել է 477 դրամ, եվրոյինը՝ 528, ռուբլունը՝ 7 դրամ 49 լումա, ֆունտինը՝ 592 դրամ։
Նոյեմբերի 8-ին հանրապետության տարածքում սպասվում է առանց տեղումների եղանակ: Օդի ջերմաստիճանն աստիճանաբար կբարձրանա 4-5 աստիճանով: Երեւանում նույնպես վաղը տեղումներ չեն սպասվում:
