Օրեր շարունակ պահպանվող ինտրիգը հանգուցալուծվեց. վարչապետ Կարեն Կարապետյանը, ինչպես եւ խոստացել էր, հրապարակային հայտարարել է, որ ՀՀԿ-ին անդամագրվելու դիմում է ներկայացրել: Ասում է՝ իր որոշումը պայմանավորված է այն հանգամանքով, որ վարչապետի պաշտոնին իրեն հրավիրել է հանրապետության նախագահը, որը նաեւ ՀՀԿ-ի ղեկավարն է:
Կարեն Կարապետյանին հոգեհարազատ է Հանրապետականի պահպանողական գաղափարախոսությունը, նաեւ ընդունելի են կուսակցությունում ընդգրկված բազմաթիվ մարդիկ: Վստահ է, որ անհրաժեշտ է շատ բան փոխել երկրի տնտեսական-սոցիալական կյանքում, առավել եւս՝ պետական կառավարման համակարգում: Ինչ վերաբերում է նոր կառավարության անկուսակցական անդամներին. Կարեն Կարապետյանը հայտարարել է, որ նրանց անդամակցության հարցում որեւէ պարտադրանք չկա: Բայց նախարարները պատրաստվում են հերթով դիմում գրել:
Գյուղնախարարն ասում է՝ պարտադիր չէ Հանրապետականին անդամակցությունը, բայց ինքը թիմային աշխատող է, հետեւելու է թիմի մյուս անդամներին: Իգնատի Առաքելյանին նույնպես հոգեհարազատ է ՀՀԿ-ի գաղափարախոսությունը, բայց չի կարողանում Նժդեհի գաղափարներից իրեն հոգեհարազատ որեւէ բան առանձնացնել. պարզապես ծանոթ չէ: Տրանսպորտի նախարարը նույնպես հերքում է պարտադրանքի մասին խոսակցությունները: Ասում է՝ մինչեւ հիմա ՀՀԿ-ի անդամ չի եղել, քանի որ քաղաքականությամբ չի զբաղվել: Իսկ մշակույթի նախարարը շարունակում է համառել: Արմեն Ամիրյանը Հանրապետականին անդամակցելու դիմում չի ներկայացրել. չի շտապում: Հիշեցնենք, որ շաբաթ՝ նոյեմբերի 26-ին կայանալու է ՀՀԿ-ի համագումարը: Մամուլի տեղեկություններով, այդ օրն անկուսակցական բոլոր նախարարները Հանրապետական են դառնալու, իսկ Կարեն Կարապետյանն ընտրվելու է կուսակցության փոխնախագահ:
Եվ կառավարության նիստում քննարկված եւ հաստատված հարցերի մասին: Վիրավորում ստացած երկու զինծառայողների պաշտպանության նախարարության միջոցներով կուղարկեն արտերկիր՝ բուժման: Զինծառայող Մհեր Պետրոսյանը բուժման կմեկնի Գերմանիա, Աշոտ Գրիգորյանը՝ Ռուսաստան: Կառավարությունն ակտիվացնում է «բաց երկնքի» քաղաքականության իրականացումը: Կարեն Կարապետյանը քաղավիացիայի վարչությանը հանձնարարել է մինչեւ տարեվերջ անելիքների ծրագիր ներկայացնել, փորձել հասկանալ, թե ինչ նոր ուղղություններ է հնարավոր գործարկել, ինչ ընկերությունների Հայաստան հրավիրել: Սերգեյ Ավետիսյանն արդեն Հայաստանի եւ Մոլդովայի ու Ղազախստանի միջեւ օդային հաղորդակցության մասին համաձայնագրեր էր բերել կառավարություն:
Օրերս տարբեր մակարդակներով ակտիվորեն քննարկվում էր նաեւ ռուսաստանցի պաշտոնյաներից մեկի հայտարարությունն այն մասին, որ նախկին ԽՍՀՄ երկրներում ռուսերենը պետք է օրենսդրորեն կարգավիճակ ստանա: Կրթության նախարարը վերջ դրեց տարատեսակ մեկնաբանություններին. Հայաստանի Հանրապետության պետական լեզուն հայերենն է, մեր անկախության հիմնարար արժեքներից մեկը, եւ փոփոխության ենթակա չէ: Այլ հարց է օտար լեզուների զարգացման հիմնախնդիրը: Լեւոն Մկրտչյանի կարծիքով՝ եթե ուզում ենք գիտակրթական պոտենցիալ ունեցող տարածք դառնալ, մեր երկրի քաղաքացիները պետք է մայրենիի փայլուն տիրապետումից զատ, նաեւ օտար լեւզուների իմացություն ունենան: Բայց լեզուների, այդ թվում՝ ռուսերենի խորացված ուսուցումը, նախարարի հավաստմամբ, որեւէ կապ չունի լեզվի պետական կարգավիճակի հետ:
Մոսկվայում սպանել են Հայաստանի քաղաքացի Գեւորգ Գեւորգյանին: Նա շինարարական բիզնեսով էր զբաղվում: Քաղաքի Լիտովյան պուրակին կից բնակելի տներից մեկի մոտակայքում հրազենային վիրավորումով տղամարդու դիակ են հայտնաբերել, նրանից 300 մետր հեռավորությամբ՝ ինքնաձիգ, որից էլ, ենթադրաբար, կրակել են նրա վրա: Դիակի մոտ կայանված մեքենայում երեք գնդակի հետք է հայտնաբերվել: Իրավապահների տեղեկացմամբ, հանցագործությունը նման է պատվերով սպանության: Քրեական գործ է հարուցվել:
Գյուղապետի որդին գիշերվա կեսին զվարճացել է գյուղի փողոցներում: Գեղարքունիքի մարզի Այրք գյուղում նոյեմբերի 23-ին կրակոցներ են հնչել: Պարզվել է, որ Վերին Շորժայի գյուղապետի որդին գիշերը գազային ատրճանակից կրակոցներ արձակելով շրջել է գյուղում: Ահաբեկված գյուղացիներն ահազանգել են իրավապահներին, որոնք էլ բերման են ենթարկել երիտասարդին: Բացատրական աշխատանքներից հետո նրան բաց են թողել: Ոստիկանությունը դեպքի մասին այլ մանրամասներ չի հայտնում:
Ողբերգական դեպք Լոռու մարզում: Փամբակ գյուղի անտառում հաստաբուն ծառն ընկել է 36-ամյա երիտասարդի վրա: Նա տեղում մահացել է: Մահացածը Փամբակ գյուղի բնակիչ Կարեն Տոնոյանն է, ով մի քանի օր առաջ էր վերադարձել Ռուսաստանից: Տոնոյանը հորեղբորորդու հետ գնացել էր անտառ՝ ծառ կտրելու: Նրանց կտրած ծառն էլ սպանել է երիտասարդին:
Նոյեմբերի 24-ին դոլարը փոքր-ինչ զիջել է դիրքերը, եվրոն՝ կտրուկ նվազել: Արդյունքում դոլարի փոխարժեքը կազմել է 479 դրամ, եվրոյինը՝ 506, ռուբլունը՝ 7 դրամ 45 լումա, ֆունտինը՝ 596 դրամ։
Նոյեմբերի 25-ին հանրապետությունում սպասվում է առանց տեղումների եղանակ: Լոռիում, Տավուշում, Սյունիքում եւ Արցախում օդի ջերմաստիճանն աստիճանաբար 3-4 աստիճանով կբարձրանա: Երեւանում նույնպես վաղը տեղումներ չեն սպասվում:
