Տեխնիկական խնդիրներ կամ օդաչուների սխալ: Սրանք են նախօրեին Սեւ ծովում ռուսական Տու-154 օդանավի կործանման հիմնական վարկածները: Աղետի հետաքննությամբ զբաղվող կառավարական հանձնաժողովն ահաբեկչությունը որպես հիմնական վարկած չի դիտարկում: Օդանավի սեւ արկղերը դեռեւս չեն գտել: Ռուսաստանի ՊՆ Տու-154 օդանավի կործանման հետեւանքով 92 մարդ է զոհվել՝ 84 ուղեւոր եւ անձնակազմի 8 անդամ: Թռիչքից գրեթե անմիջապես հետո կործանված օդանավը սիրիական Լաթաքիա էր մեկնում՝ «Հմեյմիմ» ռազմաբազայի ռուսական ավիախմբի Ամանորը շնորհավորելու: Ինքնաթիռում են եղել Ալեքսանդրովի անվան երգի եւ պարի համույթի արտիստները, երեք հեռուստաալիքների լրագրողներ, զինվորականներ ու եւս մի քանի անձ: Ավիաաղետի լուրը ցնցել է իտալացի հայտնի երգիչ Տոտո Կուտոնիոյին: Պարզվում է՝ Ալեքսանդրովի անվան համույթի ներկայացուցիչների խնդրանքով նա նույնպես պետք է այդ օդանավով Սիրիա մեկներ, սակայն չի կարողացել փոխել նախապես ծրագրված համերգային գրաֆիկը: «Սկսում եմ հավատալ ճակատագրին»,- հայտարարել է Կուտունիոն։
ԵՏՄ անդամ պետությունների ղեկավարները կրկին հանդիպել են: Եվրասիական տնտեսական բարձրագույն խորհրդի նիստին եւ ՀԱՊԿ հավաքական անվտանգության խորհրդի նստաշրջանին մասնակցելու նպատակով առավոտյան Ռուսաստան է մեկնել նաեւ նախագահ Սերժ Սարգսյանը: Արդեն երկրորդ անգամ, սակայն, նախագահները հավաքվում են ոչ ամբողջական կազմով: Հոկտեմբերին Հայաստան չէր եկել Ղազախստանի նախագահը, պետերբուրգյան հանդիպումից էլ բացակայում է Բելառուսի ղեկավարը:
Եվրասիական տնտեսական բարձրագույն խորհրդի նիստը մեկնարկել է Սոչիում Տու-154-ի ավիաաղետի զոհերի հիշատակը մեկ րոպե լռությամբ հարգելով: Սերժ Սարգսյանը նիստում ունեցած ելույթում ներկայացրել է Միության գործունեության՝ մեր երկրի գնահատականները, խոսել ձեռքբերումների մասին, բայց նաեւ ընդգծել, որ չնայած լուրջ առաջընթացին՝ բազմաթիվ հարցեր բաց են մնացել: Սերժ Սարգսյանը կարեւորել է արդյունավետ համագործակցության հաստատումը, ինտեգրացիոն միության միջազգային դիրքավորումը՝ այս առումով առանձնացնելով ԵՏՄ Մաքսային օրենսգրքի ընդունման անհրաժեշտությունը: Հավաքի ավարտին երկրների ղեկավարները, այդ թվում՝ Ղրղզստանի նախագահը, ստորագրել են Մաքսային օրենսգիրքը: Ավելի վաղ հաղորդվել էր, որ Ղրղզստանը չի ստորագրել այն:
Իսկ ՀԱՊԿ հավաքական անվտանգության խորհրդի նստաշրջանում երկրորդ անգամ հետաձգվել է կազմակերպության նոր գլխավոր քարտուղարի ընտրությունը: Նիկոլայ Բորդյուժան տեղեկացրել է, որ ընտրությունը կկատարվի խորհրդի ապրիլի հերթական նիստում: Թեկնածուի քննարկումն ու ընտրությունը, նրա հավաստմամբ, հետաձգվել է քվորումի բացակայության պատճառով: Դեռեւս հոկտեմբերին կայացած երեւանյան հանդիպման ժամանակ ռոտացիոն սկզբունքով ՀԱՊԿ ղեկավար պետք է ընտրվեր Հայաստանի ներկայացուցիչը, ինչը, սակայն, չարվեց: Այդ ժամանակ լուրեր տարածվեցին, որ կողմերը համաձայն չեն Հայաստանի ներկայացրած թեկնածուին:
Կապանում 26-ամյա ծննդկան է մահացել: Մարինե Իվանյանն առաջնեկին բնական ճանապարհով է լույս աշխարհ բերել, բայց երեխան մահացած է եղել: Ծննդաբերությունից մոտ կես ժամ անց կնոջ մոտ արյունահոսություն է սկսվել, բժիշկները չեն կարողացել դադարեցնել այն: Ծննդատան վարիչ Սամվել Միկոյանը նշել է, որ պտուղը մեռելածին է եղել, ինչի հետեւանքով Մարինեի մոտ արյան մակարդելիության խանգարում է առաջացել: 26-ամյա կնոջն ընդունել են պղտի ներարգանդային մահով: Չեն համարձակվել Երեւան տեղափոխել, բայց մինչեւ վերջ պայքարել են, որ արգանդը չհեռացնեն եւ հետագայում կարողանա հղիանալ: 26-ամյա ծննդկանի ու նորածնի մահվան դեպքի առիթով քրեական գործ է հարուցվել: Նշենք, որ վերջին ամիսների ընթացքում սա 4-րդ դեպքն է, որ ծննդաբերությունից հետո կինը մահանում է արյունահոսության հետեւանքով:
Ի՞նչ վտանգներ է պարունակում վրացական «Նավթի եւ գազի կորպորացիա»-ի բաժնետոմսերի 25%-ի վաճառքը, որով հետաքրքրված է ադրբեջանական SOCAR-ը: Հայաստանի էներգետիկ անվտանգության համար այդ գործարքի ռիսկերի հարցով քննարկման ժամանակ փորձագետ Արմեն Մանվելյանը կարծիք է հայտնել, որ SOCAR-ը Հայաստան մտնող գազատարով հետաքրքրված է զուտ մեր երկրի հետ հարաբերությունների առումով, առավել եւս, որ արդեն հայտարարվել է. առեւտրային տեսանկյունից բաժնետոմսերի ձեռքբերումը շահավետ չէ: Ըստ փորձագետի՝ խնդիրն այս դեպքում քաղաքական ենթատեքստ ունի: Վրացական կողմը, սակայն, շարունակում է պնդել. կորպորացիան ցանկանում է վաճառքի արդյունքում լուծել իր ֆինանսական խնդիրները: Վրաստանի Զարգացման ինստիտուտի կառավարման խորհրդի նախագահ Գիա Խուխաշվիլիի հավաստմամբ՝ 25 տոկոսն ընկերության մենեջմենթում հատուկ իրավունքներ չի տալիս, մյուս կողմից՝ Վրաստանը միջազգային պարտավորություններ ունի եւ խստորեն վերահսկելու է գազի տարանցումը: Միջազգային ընկերություն է եւ խաղի կանոններին հետեւելու է նաեւ SOCAR-ը, եւ ցանկացած դեպքում դրամատիկ զարգացումները բացառված են:
Տարին ավարտվում է հերթական կորուստներով: Կյանքից հեռացել է դիվանագետ, Բրազիլիայում Հայաստանի նախկին դեսպան Աշոտ Եղիազարյանը։ Նա բազմաթիվ պաշտոններ է զբաղեցրել ԽՍՀՄ, ՀԽՍՀ արտգործնախարարություններում, այնուհետեւ՝ անկախ Հայաստանի արտաքին քաղաքական գերատեսչությունում: 2002 թվականին Աշոտ Եղիազարյանին շնորհվել է արտակարգ դեսպանորդ եւ լիազոր նախարարի դիվանագիտական աստիճան:
Հանկարծամահ է եղել «Կարգին սերիալ»-ի հայտնի Ջեմման՝ Ժենյա Մկրտումյանը: Դերասանուհին 68 տարեկան էր: Նրան վատ ինքնազգացողությամբ հիվանդանոց են տեղափոխել, սակայն բժիշկները չեն հասցրել որեւէ քայլ ձեռնարկել: Ժենյա Մկրտումյանը Սունդուկյանի անվան թատրոնի դերասանուհի էր: Հեռուստատեսությամբ վարել է «Հեքիաթն է կանչում», «Ռուսաց լեզու» հաղորդումները, խաղացել մի շարք հեռուստատեսային ներկայացումներում, «Մեր բակը 2»,«Երեք ընկեր», «Տաքսի, էլի լավա», «Եթե բոլորը», «Շնորհակալություն, հայրիկ» եւ այլ ֆիլմերում:
52 տարեկանում կյանքից հեռացել է միջազգային գրոսմայստեր Աշոտ Անաստասյանը: Շախմատի Հայաստանի ութակի չեմպիոնը ծնվել էր 1964 թվականի հուլիսի 16-ին, Երեւանում: Նա միջազգային գրոսմայստեր կոչում է ստացել 1993-ին: Հայաստանի հավաքականի կազմում 6 անգամ մասնակցել է շախմատի Օլիմպիադաների, հուլիսին Դրեզդենում աշխարհի վետերանների թիմային առաջնության փոխչեմպիոն է դարձել:
Համաշխարհային աստղերի շարքերը նույնպես նոսրացան. Մեծ Բրիտանիայում մահացել է աշխարհահռչակ երգիչ Ջորջ Մայքլը: Նա 53 տարեկան էր: Ջորջ Մայքլը կամ Յորղոս Կիրիակոս Պանայոտուն ծնունդով Կիպրոսից էր: Նա 2 անգամ արժանացել է «Գրեմմի», 5 անգամ՝ MTV-ի մրցանակի: Երգչի ներկայացուցիչը չի նշել նրա մահվան պատճառը: Last Christmas հիթը կատարողը կյանքից հեռացել է Սուրբ Ծննդի օրը, որի մասին երգում էր դեռեւս Wham խմբի կազմում:
Եղանակը խափանել է օդանավակայանների աշխատանքն ու մարդկանց ծրագրերը: Մոսկվայում անբարենպաստ եղանակային պայմանների պատճառով դեպի Երեւան մի շարք չվերթներ են հետաձգվել: «Զվարթնոց» օդանավակայանի մամուլի ծառայության հաղորդմամբ՝ հետաձգվել են ինչպես Մոսկվա-Երեւան, այնպես էլ Երեւան-Մոսկվա որոշ չվերթներ: Բացի այդ, չեն իրականացվել Երեւան-Կիեւ, Երեւան-Նովոսիբիրսկ, Երեւան-Կրասնոդար չվերթները։
Դեկտեմբերի 26-ին բոլոր հիմնական փոխարժեքների աճ է արձանագրվել: Արդյունքում դոլարի փոխարժեքն այսօր կազմել է 482 դրամ, եվրոյինը՝ 504, ռուբլունը՝ 7 դրամ 94 լումա, ֆունտինը՝ 592 դրամ:
Դեկտեմբերի 27-ին ձյունը կշարունակի ուրախացնել երեխաներին, իսկ վարորդների համար՝ խնդիրներ ստեղծել: Հանրապետության շրջանների մեծ մասում տեղումները կշարունակվեն, առանձին հատվածներում բուք եւ ցածր տեսանելիություն կլինի: Օդի ջերմաստիճանն էապես չի փոխվի: Երեւանում նույնպես վաղը ձյան թույլ տեղումներ են սպասվում: