Իսրայելի պաշտոնական դիրքորոշումն է՝ թույլ չտալ, որպեսզի Բելառուսն Իսրայելի քաղաքացի Ալեքսանդր Լապշինին Ադրբեջանին արտահանձնի: NEWS.am-ի թղթակցի հետ զրույցում այս մասին հայտարարեց Մինսկում Իսրայելի փոխդեսպան Յուլիա Ռաչինսկի-Սպիվակովան:
Դիվանագիտական առաքելության ներկայացուցչի խոսքով՝ իսրայելական կողմը Բելառուսի եւ Ռուսաստանի գործընկերների հետ (Լապշինը նաեւ ՌԴ քաղաքացի է) շարունակելու է այդ ուղղությամբ ջանքերը:
Նա հիշեցրեց, որ դեսպանատունն իրավասու չէ միջամտել իրավաբանական գործընթացին, կարող է միայն խորհրդատվական ծառայություններ մատուցել Ալեքսանդր Լապշինին: «Որքանով տեղյակ ենք, Լապշինի փաստաբանները վերաքննիչ բողոք են ներկայացնելու դատախազության որոշման դեմ»,- նշեց դեսպանության ներկայացուցիչը:
Դեկտեմբերի կեսին Լապշինը, որը նաեւ ՌԴ քաղաքացի է, Մինսկում ձերբակալվել էր Ադրբեջանի հարցումով, որտեղ նրան ԼՂՀ այցելության համար ընդգրկել էին «սեւ ցուցակում»։ Լապշինը, սակայն, 2015-ին Վրաստանի տարածքով եւ Ուկրաինայի քաղաքացու անձնագրով մտել էր Ադրբեջան այն բանի շնորհիվ, որ նրա անվան գրության մեջ տառի տարբերություն կա։ Ուկրաինական անձնագրում գրված է «Օլեկսանդր»։ Դրանից հետո Ադրբեջանը բլոգերի նկատմամբ միջազգային հետախուզում էր սկսել «Պետական սահմանի մասին» օրենքի խախտման հոդվածով։
Հունվարի 17-ին Բելառուսի դատախազությունը որոշել է բավարարել Ալեքսանդր Լապշինի արտահանձնման մասին Ադրբեջանի իշխանությունների հայցը: Հատկանշական է, որ շուրջ երկու օր բելառուսական դատախազությունը թաքցրել է այդ տեղեկությունը:
