ՀՀ նախկին փոխվարչապետ և պաշտպանության նախկին փոխնախարար, Նորք Մարաշի խմբի գործով ամբաստանյալ Վահան Շիրխանյանին «Երևան-Կենտրոն» ՔԿՀ-ից տեղափոխել են քաղաքացիական հիվանդանոց:
Ըստ ԱՆ քրեակատարողական վարչության տեղեկատվության, Վահան Շիրխանյանը քաղաքացիական հիվանդանոց է տեղափոխվել հետազոտվելու և բուժման նպատակով:
Նշենք, որ Վահան Շիրխանյանն առողջական խնդիրներ ունի, ինչի պատճառով չէր կարող մասնակցել դատական նիստերին: Նրա պաշտպան Հայկ Ալումյանը բազմիցս հայտարարել է, որ Վահան Շիրխանյանի առողջական վիճակը գնալով վատանում է: Նրա խոսքով, ինքը փետրվարի 11-ից չի կարողանում տեսնել իր պաշտպանյալին: «Նրա մոտ չեն թողնում ոչ միայն հարազատներին ու լրագրողներին, այլեւ պաշտպանին: Պատճառը շատ խորն է. նրանք փորձում են Վահան Շիրխանյանի վրա հոգեբանական ճնշում գործադրել»,- նշեց Ալումյանը:
Հիշեցնենք, որ Վահան Շիրխանյանը ձերբակալվել է 2015թ.-ի դեկտեմբերի 21-ին Նորք-Մարաշում զինված խմբավորման վնասազերծման գործի շրջանակում: Նա մեղադրվում է խմբավորման ղեկավար Արթուր Վարդանյանի հետ համագործակցության մեջ: 2016-ի սեպտեմբերին քննչական մարմինը Վահան Շիրխանյանին նոր մեղադրանք առաջադրեց՝ իշխանության գրավման նախապատրաստում:
Մարդու իրավունքների եվրոպական դատարանը (ՄԻԵԴ) Հայաստանի կառավարությանը հարցեր է ուղղել՝ կապված պաշտպանության նախկին փոխնախարար Վահան Շիրխանյանի առողջության հետ:
