«Հաց բերող» անունով հայտնի Արթուր Սարգսյանի մահվան փաստով քրեական գործ է հարուցվել, նրա իրավահաջորդ է ճանաչվել եղբայրը՝ Արսեն Սարգսյանը: Նա ցանկություն է հայտնել, որպեսզի փորձաքննություններում ներգրավվեն նաեւ միջազգային փորձագետներ:

Գործը հարուցվել է քրեական օրենսգրքի 130-րդ հոդվածի 2-րդ մասի հատկանիշներով՝ բժշկական օգնություն ու սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահը: Վահրամ Բաղդասարյանն ասում է՝ դեռ վաղ է այս հարցով մեկնաբանություններ անել. նախաքննությունը կպարզի, մեղավորները կպատժվեն: Բաղդասարյանը նաեւ կարծիք է հայտնել, որ եթե երկրում նախընտրական շրջան չլիներ, նման մեղադրանքներ չէին հնչի, եւ կոչ արել զերծ մնալ շահարկումներից:

Երեկ նույն կոչն է արել նաեւ նրա կուսակից Էդուարդ Շարմազանովը: Շարմազանովը կոնկրետ անուններ չի նշել, բայց լրագրողների խնդրանքով նրա հայտարարությանն այսօր պատասխանել է Նիկոլ Փաշինյանը: Հայտարարել է, որ գոնե իրենց այդ մեղադրանքն ուղղված լինել չէր կարող:

«Հաց բերողի» հիշատակին երեկ մոմավառություն են կազմակերպել մի շարք քաղաքներում, իսկ Երեւանում այսօր նույնպես Ազատության հրապարակից երթ է մեկնարկել: Հավաքվածներին միացել է նաեւ Վարդան Օսկանյանը: Իսկ բողոքի երթի տասնյակ մասնակիցներ որոշ ժամանակ նստել են Մաշտոցի պողոտայում՝ փակելով երթեւեկությունը: Ոստիկաններին ի վերջո հաջողվել է բանակցությունների միջոցով բացել պողոտան:

Հերթական միջադեպը նախընտրական քարոզչության մասնակիցների միջեւ: Մամուլի հրապարակումների համաձայն՝ երեկ երեկոյան Աջափնյակում ծեծի է ենթարկվել «Ծառուկյան» դաշինքից թիվ 2 ընտրատարածքում ռեյտինգային ընտրացուցակով առաջադրված Վահան Կարապետյանը, որը հայտնի է «Չերրիի Վահան» անունով: ԲՀԿ-ում հայտարարել են, որ Կարապետյանին ծեծել են նույն ընտրատարածքում առաջադրված Արման Սահակյանի թիմակիցները: Սակայն ոստիկանության հասարակայնության հետ կապերի վարչության պետ Աշոտ Ահարոնյանը մեզ հետ զրույցում նշել է, որ Վահան Կարապետյանը ոստիկանությունում բացատրություն է տվել ու նշել, որ ընկել է:

ԲՀԿ մամուլի խոսնակը ֆեյսբուքյան գրառմամբ հայտարարել է, որ Կարապետյանին դարանակալել եւ փորձել են հաշվեհարդար տեսնել Վահան Կարապետյանի հետ: ՀՀԿ-ի տարածքային շտաբի պատասխան հայտարարության մեջ էլ նշվում է, որ միջադեպը կապ չունի քաղաքական գործընթացների եւ առաջիկա ընտրությունների հետ: Այստեղ նաեւ հայտնել են, որ միջադեպը հրահրել են ԲՀԿ պատգամավորն անձամբ՝ համակիրների հետ միասին:

Արարատի մարզում խոշոր վթար է տեղի ունեցել: Արգավանդ գյուղում իրար են բախվել Ford եւ Ferrari մակնիշի ավտոմեքենաները: Ականատեսները նշում են, որ բախումից հետո Ferrari-ի վարորդը նաեւ վրաերթի է ենթարկել մի հետիոտնի: Վարորդները լուրջ մարմնական վնասվածք չեն ստացել, իսկ վրաերթի ենթարկված երիտասարդը հիվանդանոց է տեղափոխվել:

Ֆրանսիացի աշխարհահռչակ դաշնակահար Ռիշար Կլայդերմանը կրկին Հայաստանում է: 63-ամյա երաժիշտը Երեւան է ժամանել վաղ առավոտյան, իսկ մի քանի ժամ անց հանդիպել լրագրողներին: Իսկ երկրպագուներին երաժիշտը սպասում է վաղը կայանալիք համերգին: Նշենք, որ դաշնակահարին հռչակ բերեց Պոլ դե Սենեվիլի Ballade pour Adeline ստեղծագործության կատարումը: Այս սինգլը 22 մլն օրինակով վաճառվել է աշխարհի ավելի քան 30 երկրներում: Կլայդերմանը հասցրել է ավելի քան 1200 երաժշտական ստեղծագործություն ձայնագրել, ավելի քան 100 սկավառակ թողարկել:

Դոլարը շարունակում է զիջել դիրքերը, իսկ եվրոն թանկացել է եւս 2.5 դրամով: Արդյունքում դոլարի փոխարժեքն այսօր կազմել է 483 դրամ, եվրոյինը՝ 520, ռուբլունը՝ 8 դրամ 37 լումա, ֆունտինը՝ 598 դրամ:

Մարտի 18-ի ցերեկն ու 19-ի գիշերը հանրապետության լեռնային եւ նախալեռնային գոտիներում ձյան տեսքով առատ տեղումներ են սպասվում, առանձին հատվածներում՝ բուք: Ճանապարհներին մերկասառույց կլինի: Երեւանում վաղը ժամանակ առ ժամանակ տեղումներ կլինեն: Մայրաքաղաքում գիշերը կդիտվի +1+3, ցերեկը՝ +6+8 աստիճան տաքություն: