Գլխավոր դատախազությունը խորհրդարանական ընտրությունների ժամանակ խախտումների մասին 745 ահազանգ է ստուգել: Եվս 278 ահազանգ ստացել է ոստիկանությունը: Ստուգումների արդյունքում 9 դեպքով քրեական գործեր են հարուցվել:
Հատուկ քննչական ծառայությունում էլ քվեարկության ժամանակ լրագրողների աշխատանքը խոչընդոտելու փաստով հարուցված քրեական գործեր կան: Խոսքը «Ազատություն» ռադիոկայանի եւ «Araratnews.am» կայքի լրագրողների աշխատանքը խոչընդոտելու եւ նրանց նկատմամբ բռնություն գործադրելու մասին է:
Իսկ Հայաստանի նոր Ազգային ժողովի առաջին նիստը տեղի կունենա խորհրդարանի ձեւավորվելուց հետո երրորդ հինգշաբթի օրը: Խորհրդարանը ձեւավորված կհամարվի ապրիլի 9-ին, երբ կլինի Կենտրոնական ընտրական հանձնաժողովի որոշումը: Սակայն ընտրությունների արդյունքների բողոքարկման դեպքում Ազգային ժողովը ձեւավորված կհամարվի արդեն Սահմանադրական դատարանի որոշմամբ: Սահմանադրագետ Հրայր Թովմասյանը նշում է, որ եթե ապրիլի 9-ին Ազգային ժողովը ձեւավորվի, ապա նոր խորհրդարանի առաջին նիստը կկայանա ապրիլի 27-ին: Նույն օրն էլ կառավարությունը վայր կդնի լիազորությունները: Դրանից հետո արդեն 10 օրվա ընթացքում նախագահը, խորհրդակցելով խորհրդարանական խմբակցությունների հետ, նոր վարչապետ կնշանակի:
Հիշեցնենք, որ ապրիլի 2-ին կայացած ընտրությունների նախնական արդյունքների համաձայն՝ Ազգային ժողով են անցնում 4 ուժեր՝ ՀՀԿ-ն, «Ծառուկյան» դաշինքը, «Ելք» դաշինքը եւ ՀՅԴ-ն: Հանրապետականը կունենա 58 մանդատ, «Ծառուկյան» դաշինքը՝ 31, «Ելք» դաշինքը՝ 9 եւ ՀՅԴ-ն՝ 7 մանդատ:
Շուտով մայրաքաղաքի բնակիչներին նոր ընտրություն է սպասվում. մայիսի 14-ին նախանշված են Երեւանի ավագանու ընտրությունները: Որեւէ կուսակցություն կամ դաշինք, սակայն, մասնակցության համար դեռեւս փաստաթուղթ չի ներկայացրել Կենտրոնական ընտրական հանձնաժողով:
«Ելք»-ը մասնակցելու է Երեւանի ավագանու ընտրություններին եւ սահմանված ժամկետում կներկայացնի բոլոր փաստաթղթերը: Դաշինքի ներկայացուցիչը մեր թղթակցին ասել է, որ որոշումը կայացվել է դեռեւս հուշագիրը ստորագրվելու պահին: Ինչ վերաբերում է քաղաքապետի հավանական թեկնածուն. Ալեն Սիմոնյանը քիչ հավանական է համարում, որ այդ պաշտոնում կառաջադրվի Նիկոլ Փաշինյանը: Դաշինքում դեռ քննարկում են հարցը:
Իսկ ավագանու ընտրություններին մասնակցելու համար անհրաժեշտ փաստաթղթերը պետք է ներկայացվեն մարտի 30-ից մինչեւ ապրիլի 9-ի ժամը 18:00-ն: Կուսակցությունների եւ դաշինքների ցուցակները կգրանցվեն ապրիլի 9-14-ին, իսկ նախընտրական քարոզչությունը կմեկնարկի ապրիլի 21-ին: Ոստիկանության տվյալներով՝ ընտրությանը մասնակցելու իրավունք ունի 841.973 քաղաքացի:
Մերձմոսկվայի Ռազվիլկա ավանում «Մերսեդես»-ի բեռնախցում երկու տղամարդու մարմին են հայտնաբերել: Երկուսն էլ ազգությամբ հայ են: Սպանվածներից Խորեն Մարգարյանը Հայաստանի քաղաքացի է, Միքայել Լալայանը՝ Աբխազիայի: Իրավապահների վարկածով՝ սպանելուց առաջ տղամարդկանց խոշտանգել են:
Խորեն Մարգարյանն Արմավիրի մարզի Արմավիր քաղաքից էր, երկար տարիներ բնակվում էր Մոսկվայում: Մեր տեղեկություններով՝ 36-ամյա Մարգարյանի հարազատներն արդեն Մոսկվա են մեկնել՝ երիտասարդի դին Հայաստան տեղափոխելու համար: «Մերսեդես»-ը երկուշաբթի երեկոյան հայտնաբերել է մոտակա տներից մեկի բնակիչը: Նրան կասկածելի է թվացել, որ անծանոթ մեքենան երկար ժամանակ կայանված է իր տան մոտ: Տղամարդը ոստիկանություն է զանգահարել: Իրավապահները կարծում են, որ սպանությունը պատվիրված է եղել:
Սանկտ Պետերբուրգի մետրոյում նախօրեին տեղի ունեցած ահաբեկչության զոհերի թիվը հասել է 14-ի: 49 տուժած դեռեւս հիվանդանոցներում է: Պետերբուրգում Հայաստանի գլխավոր հյուպատոսությունից հայտնել են, որ տուժած հայերի մասին տվյալները չեն հաստատվել:
Մինչ այդ, սոցիալական ցանցերում պայթյունի ենթադրյալ հեղինակի՝ 22-ամյա Ակբարժոն Ջալալովի նոր լուսանկարներ են գտել: Տեղեկությունների համաձայն՝ Ջալալովն ազգությամբ ուզբեկ է, ծնվել է Ղրղզստանում: Վերջին տարիներին նա Ռուսաստանում էր բնակվում: Ռուսաստանի իրավապահներն էլ հայտնել են, որ մետրոյում պայթուցիկ սարքը կարող էր գործի դնել տղամարդը, որի մարմնի մնացորդները հայտնաբերել են գնացքի երրորդ վագոնում: Մահապարտի անձը հաստատվել է, սակայն հետաքննության շահերից ելնելով՝ նրա մասին մանրամասն տվյալներ չեն հրապարակվում:
Լոռու մարզում մահվան ելքով վթար է տեղի ունեցել: Շահումյան գյուղի սկզբնամասում «Ford Transit»-ը բախվել է «Volvo EN 400» մակնիշի կիսակցորդով բեռնատարին: «Ford»-ի 38-ամյա վարորդ Արման Թամամյանը հիվանդանոցում մահացել է: Քրեական գործ է հարուցվել՝ Ճանապարհային երթեւեկության եւ տրանսպորտային միջոցների շահագործման կանոնները խախտելու հոդվածով:
Դոլարն ամրապնդում է դիրքերը, եվրոն եւ ռուբլին էժանանում են: Արդյունքում դոլարի փոխարժեքն այսօր կազմել է 484 դրամ, եվրոյինը՝ 515, ռուբլունը՝ 8 դրամ 57 լումա, ֆունտինը՝ 603 դրամ:
Ապրիլի 5-ին հանրապետությունում սպասվում է առանց տեղումների եղանակ: Օդի ջերմաստիճանն աստիճանաբար 5-6 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի 1+3, ցերեկը՝ +16+18 աստիճան տաքություն: