Սահմանին ժամկետային զինվոր է վիրավորվել: Արցախի ՊԲ հյուսիսային ուղղությամբ տեղակայված զորամասերից մեկի պահպանության տեղամասում հակառակորդի արձակած կրակոցից վիրավորում է ստացել 1997 թվականին ծնված Թաթուլ Արամայիսի Հարությունյանը: Նա Ստեփանակերտի զինվորական հոսպիտալում է: Հարությունյանի վիճակը ծանր է:

Նախկին վարչապետ Հովիկ Աբրահամյանը կարծում է, որ խորհրդարանական ընտրություններն անցել են առանց խախտումների: Խոստովանում է. զբաղվել է միայն Արարատի մարզով, որտեղ «Ծառուկյան» դաշինքի տարածքային ցուցակով առաջադրվել էր նրա որդին՝ Արգամ Աբրահամյանը: Մամուլում տեղեկություններ կան, որ ՀՀԿ-ից հեռացած Աբրահամյանը «Բարգավաճ Հայաստան»-ին է միանալու. հերքեց այդ լուրերը: Նաեւ պատասխանեց քաղաքականություն վերադառնալու մասին հարցին:

Կարեն Կարապետյանի աշխատանքը նախկին վարչապետը դրական է գնահատում: Վստահեցնում է նաեւ, որ իշխանություններից նեղացած չէ, իր համար կարեւորը Հայաստանի տնտեսության զարգացումն է: Պարզվում է՝ երկար տարիներ տարբեր պաշտոններ զբաղեցրած Աբրահամյանը ժամանակ չէր գտնում մտավորական ընկերների հետ շփվելու: Հիմա այդ բացն է լրացնում:

Նորաստեղծ «Երկիր ծիրանի» կուսակցության ղեկավարն այսօր մամուլի ասուլիս է հրավիրել արտասովոր վայրում՝ «Էրեբունի» արգելոց-թանգարանի տարածքում եւ հայտարարել, որ Արգիշտի 1-ի ամրոցից Արգիշտի փողոց՝ քաղաքապետարան են տեղափոխվելու: Ինչո՞ւ չմիավորվեցին «Ելք» դաշինքի հետ՝ Երեւանի ավագանու ընտրություններին միասին մասնակցելու համար: Զարուհի Փոստանջյանը պատասխանեց, որ «Ելք»-ը սպոնտան ձեւավորված միավորում է, իսկ ոչ նույնատիպ գաղափարների, սկզբունքների շուրջ ձեւավորված միավորումները ձախողվում են:

Անդրադարձավ նաեւ իր մյուս մրցակցին՝ գործող քաղաքապետ Տարոն Մարգարյանին, ավելի ճիշտ՝ նրա կարողությանը: Համոզված է, որ նրա ահռելի կարողությունն անմասն չէ Երեւանի բյուջեից: Իր օրինակով գիտի. պետական պաշտոնյան չի կարող նման ունեցվածքի տեր լինել:

Մեծ Բրիտանիայում արտահերթ ընտրությունները տեղի կունենան հունիսի 8-ին: Դրանց արդյունքում էլ նախարարների նոր կաբինետ կձեւավորվի: Որոշման մասին հայտնել է վարչապետ Թերեզա Մեյը՝ հավելելով, որ Մեծ Բրիտանիային ուժեղ կառավարություն է անհրաժեշտ: Ընտրություններ անցկացնելու մասին որոշումը Մեյը կայացրել է սոցիոլոգիական հարցման նոր տվյալների ֆոնին: Դրանց համաձայն՝ իշխող Պահպանողական կուսակցությունը բարելավել է դիրքերը ժողովրդականության վարկանիշում։

Երեւանի Մալաթիա-Սեբաստիա վարչական շրջանում վիճաբանությունն ավարտվել է հրաձգությամբ: Ոստիկանությունն ահազանգ է ստացել, որ Օհանովի փողոցում կռիվ է եւ կրակում են: Իրավապահները դեպքի վայրում 5 պարկուճ են հայտնաբերել: Դատաձգաբանական փորձաքննություն է նշանակվել, հետաքննություն է կատարվում:

Արմավիրի մարզում խոշոր վթար է տեղի ունեցել: Էջմիածին-Աշտարակ ավտոճանապարհին «ՈՒԱԶ»-ը բախվել է «ԶԻԼ»-ին: Վթարի հետեւանքով 6 մարդ մարմնական վնասվածքներով հիվանդանոց է տեղափոխվել: 4-ի վիճակը ծայրահեղ ծանր է: Վիրավորներից 2-ը հարվածի ուժից դուրս են շպրտվել «ՈՒԱԶ» ավտոմեքենայից:

Մոսկվայի «Վնուկովո» օդանավակայանում ինքնաթիռի անձնակազմը բոյկոտել է Մոսկվա-Երեւան թռիչքը: «Յուտէյր» ավիաընկերության օդանավը ժամը 3-ին պետք է Երեւան ժամաներ, սակայն թռիչքից առաջ ուղեւորներից մեկը սկանդալ է հրահրել: Տղամարդը չի ցանկացել էկոնոմ կարգով թռչել եւ բիզնես կարգ է տեղափոխվել: Նկատողություն ստանալուց հետո հայհոյել է ուղեկցորդուհիներին, մտել օդաչուական խցիկ՝ օդանավի «ավագի» հետ «տղամարդավարի» խոսելու համար: Արդյունքում անձնակազմը պարզապես որոշել է չիրականացնել չվերթը: Սկանդալ հրահրած ուղեւորին հեռացրել են չվերթից, իսկ մյուսներին այլ օդանավ ու անձնակազմ է սպասարկել:

Հայաստանի տարածքում երկրաշարժ է գրանցվել: Տեղական ժամանակով 10:49-ին Սեյսմիկ պաշտպանության ծառայությունը Ստեփանավանից 18 կմ դեպի արեւմուտք երկրաշարժ է գրանցել: Ստորգետնյա ցնցման ուժգնությունն էպիկենտրոնում կազմել է 3 բալ: Ցնցումները զգացվել են Զորաշենում եւ Սարապատում:

Դոլարի փոխարժեքը շարունակել է նվազել: Ապրիլի 18-ին դոլարի փոխարժեքը կազմել է 485 դրամ, եվրոյինը՝ 517, ռուբլունը՝ 8 դրամ 66 լումա, ֆունտինը՝ 610 դրամ:

Ապրիլի 19-ին հանրապետության շրջանների մեծ մասում ժամանակ առ ժամանակ սպասվում է անձրեւ եւ ամպրոպ, առանձին վայրերում հնարավոր է կարկուտ: Օդի ջերմաստիճանն էապես չի փոխվի: Երեւանում նույնպես կարճատեւ տեղումներ կլինեն: Մայրաքաղաքում գիշերը կդիտվի +9+11, ցերեկը՝ +21+23 աստիճան տաքություն: