Մայիսի 1-ին աշխարհի բազմաթիվ երկրներում տոնում են Աշխատավորի օրը: Հայաստանի կոմունիստներն այսօր Երեւանում ավանդական մայիսմեկյան երթն են անցկացրել: Մասնակիցները կարմիր դրոշներ եւ «Կեցցե՛ մայիսի 1-ը», «Ո՛չ պատերազմին», «Ինչո՞ւ գողացաք մեր քվեները» կարգախոսներով պաստառներ են պարզել: Ակցիան ուղեկցվել է ռուսական եւ հայկական խորհրդային քայլերգերով: Երթին մասնակցող պիոներների շարասյանը նաեւ փողային նվագախումբ է ուղեկցել:
Նշենք, որ Հայաստանում մայիսի 1-ը ոչ աշխատանքային է՝ ի տարբերություն հարեւան Վրաստանի: Չնայած աշխատանքային օրվան՝ մի շարք հասարակական եւ ուսանողական կազմակերպություններ մայրաքաղաք Թբիլիսիում երթ են կազմակերպել: Մասնակիցները բողոքել են երկրում տիրող աղքատությունից եւ սոցիալական անարդարությունից, աշխատողների իրավունքների պաշտպանության կոչ արել:
Իսկ Ֆրանսիայի մայրաքաղաքում մայիսմեկյան ցույցերը վերածվել են իրավապահների հետ բախումների: Երեք ոստիկան է տուժել: Փակ դեմքերով մի քանի ցուցարարներ ոստիկանների ուղղությամբ հրահեղուկ նյութով լի շշեր ու աղբ են նետել։ Ի պատասխան՝ իրավապահներն արցունքաբեր գազն են կիրառել:
Մայիսմեկյան ցույցի են դուրս եկել նաեւ Թուրքիայի կոմունիստները: Ստամբուլում նրանք չեն խուսափել բռնություններից: Բաքըրքյոյ շրջանում մայիսի 1-ի առիթով կազմակերպված երթի ժամանակ ոստիկանության ու ցուցարարների միջեւ բախումներ են գրանցվել: Իրավապահներն օդ են կրակել: Տուժածների մասին տեղեկություններ չկան:
Մայիսի 1-ը ոչ աշխատանքային է, բայց Երեւանի քաղաքապետի թեկնածուներն այսօր էլ ակտիվորեն աշխատել են: Զարուհի Փոստանջյանը միանգամից մի քանի վարչական շրջան է այցելել: Նախ «Երկիր Ծիրանի» կուսակցության նախընտրական բուկլետներն է բաժանել Երեւանի կենտրոնում՝ նախկին «Փակ շուկա»-ի տարածքում գործող «Երեւան Սիթի» սուպերմարկետում: Աշխատակիցներից մեկը, ի դեպ, փորձել է թույլ չտալ նկարահանում կատարել, բայց կանայք արագորեն լեզու են գտել: Նուբարաշենում էլ Զարուհի Փոստանջյանը խոսել է աղբավայրի խնդրի մասին:
Իսկ մինչ Փոստանջյանը խոսում է աղբավայրի հասցրած վնասներից, Հանրապետական կուսակցության թեկնածու Տարոն Մարգարյանը խոստանում է դրա տեղում աղբի վերամշակման գործարան կառուցել: Գործող քաղաքապետին Նուբարաշենում ջերմորեն են ընդունել:
Տարոն Մարգարյանին հիշել են նաեւ «Ելք» դաշինքի քարոզարշավի ժամանակ: Նիկոլ Փաշինյանին լրագրողները խնդրել են մեկնաբանել խորհրդարանական ընտրություններում պարտված Առաքել Մովսիսյանի հայտարարությունը, թե աջակցելու է Մարգարյանին, չնայած Երեւանի բնակիչ չէ: Ի պատասխան՝ Փաշինյանը հայտնի ժողովրդական խոսքն է հիշել:
Մահացել է ապրիլյան պատերազմի հերոս Քյարամ Սլոյանի հայրը՝ Քյալաշ Սլոյանը: Նա 52 տարեկան էր: Քյարամի եղբայրը՝ Համիկ Սլոյանը նշել է, որ հայրը վերջին մի քանի օրերին հիվանդանոցում էր: Ասում է՝ Քյարամի դիակը տեսնելուց հետո վախեցած էր, չէր կարողանում իրեն տիրապետել: Հորը կհուղարկավորեն որդու՝ Քյարամի մոտ: Հիշեցնենք, որ Քյարամ Սլոյանին ադրբեջանցի զինվորները սպանել եւ գլխատել էին 2016 թվականի ապրիլյան ագրեսիայի ժամանակ: Մարդասպանները «հաղթական ավարով» լուսանկարվել էին եւ նկարները տարածել համացանցում:
Լոռու մարզում ողբերգական դեպք է տեղի ունեցել: 15-ամյա տղան ընկել է Լորուտ գյուղի Մարց գետը: Մինչ փրկարարների ժամանելը բնակիչները գետից դուրս են բերել Էդգար Քոչարյանի դին: Նա Շամուտ գյուղի բնակիչ էր:
Վրաստանի Դուշեթի շրջանում ավտոմայրուղում Հայաստանի քաղաքացու պատկանող բեռնատար է այրվել: Բեռնատարը Ռուսաստանից Հայաստան էր ուղեւորվում: Այն դատարկ է եղել: Հրդեհի հետեւանքով ոչ ոք չի տուժել: Շուրջ մեկ ժամ ավտոմայրուղու այդ հատվածում տրանսպորտային միջոցների երթեւեկությունը փակ է եղել:
Երեւանի Իսակովի պողոտայում՝ ԱՄՆ-ի դեսպանատան մոտակայքում, խոշոր պատահար է տեղի ունեցել. «Mercedes» մակնիշի մեքենան դուրս է եկել ավտոճանապարհի երթեւեկելի հատվածից, նախ բախվել հաստաբուն ծառին, ապա արտաքին լուսավորման սյանը: Պատահարի հետեւանքով վարորդը՝ 32-ամյա Արթուր Էլիզբարյանը եւ ուղեւորները՝ 20-ամյա Դավիթ Առաքելյանն ու 24-ամյա Հովհաննես Կարապետյանը մարմնական վնասվածքներով հիվանդանոց են տեղափոխվել: 20-ամյա Դավիթի վիճակը ծայրահեղ ծանր է գնահատվում:
Մայիսի 1-ին դոլարի փոխարժեքը կազմել է 483 դրամ, եվրոյինը՝ 527, ռուբլունը՝ 8 դրամ 48 լումա, ֆունտինը՝ 624 դրամ:
Մայիսի 2-ի գիշերը եւ կեսօրից հետո հանրապետության շրջանների մեծ մասում սպասվում է անձրեւ եւ ամպրոպ: Օդի ջերմաստիճանն էապես չի փոխվի: Երեւանում նույնպես գիշերն ու կեսօրից հետո տեղումներ են սպասվում: Մայրաքաղաքում գիշերը կդիտվի +11+13, ցերեկը՝ +23+25 աստիճան տաքություն: