Վանաձորում վերելակը, որի հորանը նախօրեին 14-ամյա աղջիկ է ընկել, փորձաքննության է ենթարկվել դեկտեմբերի վերջին եւ տեխնիկական որեւէ թերություն չի հայտնաբերվել: Այս մասին NEWS.am-ին ասաց Վանաձորի քաղաքապետ Մամիկոն Ասլանյանը:
«Վերելակը քաղաքապետարանի ենթակայության տակ չի գտնվում, կա լիցենզավորված ընկերություն, որը զբաղվում է: Երեկ այդ ընկերության ներկայացուցիչները նույնպես դեպքի վայրում էին, նրանք ասում են, որ դեկտեմբերի վերջին փորձաքննության է ենթարկվել վերելակը, տեխնիկական որեւէ խնդիր չի ունեցել եւ ենթակա է եղել շահագործման: Այս պահին էլ վերելակը սարքին է, սակայն չի շահագործվում, որովհետեւ դեռեւս փորձաքննություն պետք է տեղի ունենա՝ դեպքի հանգամանքները պարզելու համար»,- ասաց քաղաքապետը:
Մամիկոն Ասլանյանի խոսքով, ըստ տարածված տեղեկությունների, 14-ամյա աղջիկը փորձել է դուրս գալ եւ այդ պահին է դեպքը տեղի ունեցել:
Հիշեցնենք, որ մայիսի 30-ին Վանաձորի Աղայան փողոցի թիվ 74/1 շենքի վերելակի հորանն էր ընկել 14-ամյա Լուսինե Զ.-ն, որը ստացել է բազմակի վնասվածքներ եւ տեղափոխվել հիվանդանոց: Նրա վիճակը կայուն ծանր է:
14-ամյա Լուսինեի հետ նույն վերելակում նաեւ ընկերուհին է եղել, որը ստացել է համապատասխան բուժօգնություն եւ դուրս գրվել: