Երեւանի Շենգավիթ վարչական շրջանում այսօր՝ մայիսի 31-ին, նախկին փեսան աներոջը դանակահարել է երեխայի տեսակցության շուրջ ծագած վիճաբանության ժամանակ: NEWS.am-ի հետ զրույցում այսօր՝ մայիսի 31-ին, դանակահարված Ալբերտ Ջահավիրյանի հարազատներից մեկը պատմեց, որ նախկին աներոջը դանակահարած տղամարդը 2 տարի առաջ ամուսնալուծվել է կնոջից, նրանք երկու երեխա ունեն՝ տղա եւ աղջիկ, դատարանը երեխաների խնամակալությունը հանձնել է մորը: Սակայն, նրանց տեսակցությունների շուրջ անընդհատ տարաձայնություններ են առաջացել, որի արդյունքում էլ պատահել է այսօրվա ողբերգությունը:
«Երկու երեխա ունեն՝ մեկ աղջիկ, մեկ տղա, բայց ինքը ցանկանում էր, որ տղային իրենով անի, չնայած դատարանը երեխայի խնամակալությունը մորն է հանձնել: Այնպես չէ, որ թույլ չէին տալիս երեխային տեսակցել, միշտ էլ տեսել, շփվել է երեխայի հետ: Այնքան հոգեկան խնդիրներ ունի էդ տղան, որ մի անգամ երեխային մանկապարտեզից գողացել է, հետո վերադարձրել էր»-,պատմեց հարազատը:
Նա նշեց, որ վերջին անգամ հայրը երեխային մայիսի 30-ին է տեսել, սակայն, այսօր գնացել է Ջահավիրյանների շենքի մոտ, դուրս կանչել նախկին աներոջը եւ պահանջել, որ նստի իր մեքենան. «Ալբերտը չի նստել, նա էլ իր մեքենայի միջից հանել է դանակը եւ հարվածել նրան: Հարեւան աղջիկը տեսել է, պատմում է, որ երբ Ալբերտն ընկել է, մեքենայով ցանկացել է անգամ անցնել վրայով»:
Դանակահարված տղամարդն այս պահին գտնվում է Երեւանի «Սուրբ Աստվածամայր» հիվանդանոցի Վերակենդանացման բաժանմունքում, նրա վիճակը ծայրահեղ ծանր է: Տղամարդն ունի կրծքավանդակի ձախ հատված կտրած-ծակած վերք:
Ավելի վաղ տեղեկացրել էինք, որ նախկին փեսան դանակահարել է աներոջը: Դեպքի առթիվ նույն օրը ՀՀ ՔԿ ԵՔՔՎ Շենգավիթ վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասի հատկանիշներով, որի նախաքննության կատարումը հանձնարարվել է քննչական խմբին: Դանակահարության մեջ կասկածվող անձի ինքնությունը հայտնի է, սակայն, նա դեռ չի հայտնաբերվել: