Հայաստանը կարող է պաշտպանական ամուր կապեր ունենալ ինչպես Միացյալ Նահանգների, այնպես էլ Ռուսաստանի հետ, սակայն կարեւոր է, որ Հայաստանն այս հարցերում որոշումներն ինքնուրույն ընդունի: Այս մասին հուլիսի 28-ին՝ լրագրողների հետ հանդիպման ժամանակ ասաց Հայաստանում ԱՄՆ արտակարգ եւ լիազոր դեսպան Ռիչարդ Միլսը:
Նրա խոսքով՝ այս ոլորտում Հայաստանի եւ ԱՄՆ-ի միջեւ համագործակցությունը վերջին տարիներին խորացել է: «Սա նաեւ այն մասին է վկայում, որ Հայաստանը ցանկանում է բոլոր հարեւանների հետ աշխատել եւ իր ավանդն ունենալ միջազգային անվտանգության ապահովման գործում: Լինելով ՀԱՊԿ անդամ երկիր՝ Հայաստանը ԱՄՆ-ի հետ ռազմական հարաբերություններ է զարգացնում եւ մասնակցում է ՆԱՏՕ-ի գործողություններին: Ինչպես բազմիցս ասել եմ, սա ոչ-ոքի արդյունքով խաղ չէ»,- ամփոփեց Ռիչարդ Միլսը: